Anmelden
Am Bago u Richfrid sis Land
Am Bago u Richfrid sis Land Ört u Näme:

«Bagischwand» isch e einmalige Ortsname. Die Heimet lige höch über Mungnou ir Gmein Louperswiu. Hüt heisst d Adrässe «Bagenschwand»; es git no «unger» u «ober Bagenschwand» u de chly wyter öschtlech no «Bagenschwändeli». Dr Bach i däm Gebiet isch weniger modern u heisst no «Bagischwandgrabe». Weme die historische Yträg aluegt, de merkt me, dass d Schribwys geng ume chly gänderet isch worde. I de Amtsrächnige vo 1782 steit sogar «Bogeschwand»; chly früecher, nämlech 1742, isch einisch «Bagschwand» brucht worde u i dene Amtsrächnige vo 1629/30 steit «zuo Bagischwandt». Dä Ortsname isch aber no viu euter: Afe einisch fingt me i de Rächtsqueue vom Jahr 1389 der «Hensli von Bagenswant» Besidlet aber isch das Gebiet no viu lenger: Anere strategisch guete Laag, höch überem Bagi-schwandgrabe, mit guetem Blick uf d Ämme, hets vor langer, langer Zyt e Ärdburg gäh. 

U de isch es o no so, dass nid dä «Hensli von Bagenswant» däm Gebiet dr Name het gäh, sondern e Mano, wo «Bago» oder «Baggo» het gheisse – dr «Bagi-schwand» isch ds grodete u urbar gmachte Land vom Bago. 

Im Signouer Urbar vo 1625 hani no dr Ortsname «Bagensellj» gfunge, wo zimli sicher o e Zäme-hang mitem Personename «Bago» het; aber i weiss nid, öb dass bim «Bagischwand» isch oder de ender wyter öschtlech ir Gmein Langnou. Bim einte Ytrag steit nämlech «zwüschen Bagensälj vnnd Spitzenegg» u die Egg wär ja de ir Goou hinger. 

Äbefaus ufen Personename göh d Bezeichnige «Rifershüsere» bi Hasli u «Ryffersegg», grad bi dr Gmeinsgränze vo Röthebach u Bowiu, zrügg. Das het auso ke Zämehang miteme Ryff im Herbscht oder Früehlig, wo de zarte Pflänzli tuet schade. 

«Richfrid» oder villech o no «Riferi» dörfti dr Ursprung vo dene Bezeichnige sy – a eim Ort isch eifach ds Gebiet uf dr Egg gmeint (ursprünglech äue vor auem dr Waud) u am angere Ort e Gruppe vo Hüser, chly öschtlech vom hüttige Industriegebiet «Dicki». Vo Industrie het natürlech no niemer öppis gwüsst, wo im Jahr 1262 «de Riphenhusen» isch notiert worde. Intressant isch dä Ytrag o, wüu hie no «-husen» steit. Im 14. Jahrhundert isch de d Ändig «-hüsere» ufcho. D «Ryffersegg» isch äbefaus autbeleit: 1376 isch «Riffers-egga» notiert worde. 

31.01.2019 :: Bruno Zürcher
Meistgelesene Artikel
Kolumne - Anton Brüschweiler:   Schon bald müssen wir es wieder einreichen, das unbeliebteste Dokument aller Zeiten:...
Auszeit: Wir sitzen im Kreis auf dem Bambusboden, unter einem dicken Grasdach. Der Schamane beginnt ein...
Bei einem weiteren Bauernbetrieb wird es dunkel im Stall
Zäziwil: Am Morgen des 16. März melken die Hubachers zum letzten Mal ihre 30 Kühe. Dann werden...
E wichtige Ort  bi de Schafstäu
Ört u Näme: «Schafhuse» isch äue öppe dr bekanntischt Ort, wo vo dr Bezeichnig här...
Revanche mit Torspektakel gelungen
Unihockey, NLA, Damen: Während das erste Playoff-Spiel knapp für die Burgdorferinnen ausging, revanchierten sich...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr