Anmelden
Es Treichgäut wärt oder es Himurych
Es Treichgäut wärt oder es Himurych Ört u Näme:

Im letschte Bytrag hani unger angerem übere Ort «Roossi» z Hütlige gschribe. Drby isch mir im Waud grad hinger dranne e angere, intressante Ortsname ufgfaue: «Treichgäut». Das Gebiet, wo eso heisst, isch ufere Aahöchi obe u wird scho imene aute Verzeichnis aus «magerer Wald» bezeichnet – äbe, dä isch nume es Treichgäut wärt gsy. Mi hets zwar no erstuunt, dass grad dä Waud, wo nid sehr stotzig u mit Wäge erschlosse isch, eso isch benamset worde. Dr Waud chly wyter hinger, wo de scho uf Oberdiessbacher Bode isch, isch de viu, viu stotziger. 

Ganz angersch tönt hingäge d Bezeichnig «Rychmatt» – i weiss zwar nid, wie tüür die Matte im Trueb isch bewährtet worde. Uf au Fäu isch die Matte im Trueber Urbar usem Jahr 1531 notiert. Das isch quasi ds Grundbuech gsy u isch o bruucht worde, für d Höchi vo de Abgabe z berächne. D «Rychmatt» isch aber nume aus Abgränzig erwähnt: «byss an die Richen mattan». 

Dä Ytrag zeigt o grad, dass die Bezeichnig äue nüt mit «rych» im Sinn vo «viu Wärt» z tüe het, sondern ender mitem authochdütsche Vorname «Richo».
«Richen» isch nämlech d Genitivform vo däm. Grad es paar Mau erwähnt i historische Dokumänt isch «Richen Arni» oder «Richenarni», wo äbefaus uf dä mittuauterlech Vorname zrügg geit. Gmeint mit dere Bezeichnig isch ds Dorf Arni, wo e Zyt lang eso isch benamset worde. Die Bezeichnig toucht zersch Mau imene Dokumänt von 1408 uf: «zem Richen Arni 3½ m dinkeln»; ufere Charte usem Jahr 1577 steit «Arne pagus parvus, qui etiam dicitur Richenarne» u i de Amtsrächnige vo 1692 steit «Rychen-Arni» – speter isch die Ortsbezeichnig wieder verschwunde. 

Mit em Wort «rych» cha natürlech o es Herrschaftsgebiet gmeint sy. Chly südlech vo Äschlismatt gits ds «Öschtrichli» u das isch äue e Scherzname, wone Zämehang mit Öschtrych het. No chly erhabener tönt «Himurych». Das isch für d Gmein
Bowiu überliferet – i weiss auerdings nid, wo dass me das Himurych fingt. 

Übrigens: E Ortsname mit «rych», wo «Rychtum», «wärtvou» meint, hani im Gebiet vor Wuche-Zytig kene gfunge. 

04.01.2019 :: Bruno Zürcher
Meistgelesene Artikel
Kolumne - Anton Brüschweiler:   Schon bald müssen wir es wieder einreichen, das unbeliebteste Dokument aller Zeiten:...
Auszeit: Wir sitzen im Kreis auf dem Bambusboden, unter einem dicken Grasdach. Der Schamane beginnt ein...
Bei einem weiteren Bauernbetrieb wird es dunkel im Stall
Zäziwil: Am Morgen des 16. März melken die Hubachers zum letzten Mal ihre 30 Kühe. Dann werden...
E wichtige Ort  bi de Schafstäu
Ört u Näme: «Schafhuse» isch äue öppe dr bekanntischt Ort, wo vo dr Bezeichnig här...
Revanche mit Torspektakel gelungen
Unihockey, NLA, Damen: Während das erste Playoff-Spiel knapp für die Burgdorferinnen ausging, revanchierten sich...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr