Anmelden
Signou isch dr Sitz vor Landvogtei gsy
Signou isch dr Sitz vor Landvogtei gsy

Im Herbscht wird ir Gmein Signou e Gwärbusschtelig sy, u uf dä Aalass wetti mis Buech über d Gmein Signou chönne zeige, dass es die, wos interässiert, o es Buech chönne bschteue. Wie dick das wird sy u wie schwär chani no nid säge, aber so dick wie das vom Trueb wirds sicher. Signou isch gschichtlech es inte-rässants Gebiet. Bis 1798 isch Signou dr Houptort vor Landvogtei gsy, wo o grad Signou het gheisse. Zu dere het meh oder weniger d Gebiet vo de hüttige Gmeinde Signou, Eggiwiu, Röthebach, Teili vo Buechhouterbärg, Bigle (mit Arni u Landiswiu) ghört. 

Ds Schloss Nöi-Signou isch dr Amtssitz gsy u im Dorf isch no d Landschryberei gsy. Drum hets z Signou u z Schüpbach o rächt viu Gwärb gäh. Verglychbar wär das höchschtens no mit Langnou, aber i ga drvo us, dass ds Gwärb i beidne Gmeinde öppe die glychi Bedütig het ghaa. Schliesslich sy am Kanau vom Steinegrabe bis i d Ämme füre früecher einisch nid weniger aus 13 Wasserreder i Betrieb gsy. 

1798 sy de d Gränze nöi zoge worde, d Verwautig isch uf Langnou cho – Signou het uf einisch nümme die erschti Gyge gspiut. 1803 sy die Gränze, wo die Helveteschi Republik nöi het gmacht, bybhaute worde. Das isch o e chly dr Grund gsy, dass ds Schloss isch plünderet worde u es viu z tüür wär cho, das z renoviere. Drzue wär de das Schloss o uf Bode vom Amtsbezirk Konufinge gstange. 

D Gmein Signou het vor 1880 no chly angersch usgseh. Denn het me mit Louperschwiu u Rüederschwiu Gebiet ustuscht. So het fasch dr ganz Niedermattgrabe u öppe e Drittu vo Häleschwang zu Louperschwiu ghört u dr Reckebärg u e Bitz vo Hälischwang zu Rüderschwiu. Wieso hani no nid usegfunge, aber z obertscht uf em Reckebärg isch e Burg gsy u dr Buur uf Reckebärg het bis 1798 kener Stüüre müesse zahle! 

Was im Buech wird fähle, isch Gschicht vo de beide Signou-Burge – die sy nämlech beide uf Bowiler Bode. Die wäre de auso im däm Buech. Aber drfür gits e kompletti Gschicht über d Chiuche. Wieni das bi mine Bücher gäng mache, hani Gmein i verschiedeni Kapitu ufteilt. U de tueni vo Huus zu Huus Gschicht vo dene Hüser u vo de Lüt, wo dert hei gwohnt, dokumäntiere. Signou het sech i de letschte 200 Jahr enorm gänderet. Weme scho nume Schüpbach aaluegt u d Charte vo 1900 u de die vo hüt verglicht, isch das enorm.

24.01.2019 :: Hans Minder, Lokalhistoriker
Meistgelesene Artikel
Kolumne - Anton Brüschweiler:   Schon bald müssen wir es wieder einreichen, das unbeliebteste Dokument aller Zeiten:...
Auszeit: Wir sitzen im Kreis auf dem Bambusboden, unter einem dicken Grasdach. Der Schamane beginnt ein...
Bei einem weiteren Bauernbetrieb wird es dunkel im Stall
Zäziwil: Am Morgen des 16. März melken die Hubachers zum letzten Mal ihre 30 Kühe. Dann werden...
E wichtige Ort  bi de Schafstäu
Ört u Näme: «Schafhuse» isch äue öppe dr bekanntischt Ort, wo vo dr Bezeichnig här...
Revanche mit Torspektakel gelungen
Unihockey, NLA, Damen: Während das erste Playoff-Spiel knapp für die Burgdorferinnen ausging, revanchierten sich...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr