Anmelden
D Euphorie für d Bahn isch gross gsy

Z letscht Mau hani verzeut, dass Bärn het wöue vorwärts mache mit dr Ysebahn, Luzärn vo däm aber nüt het wöue wüsse. 

D Oscht-Wescht-Bahngseuschaft het uf au Fäu de d Strecki vo Gümlige uf Langnou afe boue. Die Linie isch natürlech dür Signou u Schüpbach düre plant gsy. Me seit, dass zersch syg vorgseh gsy, diräkt vo Schüpbach uf Langnou z ga, aber Louperswiu u Rüederswiu heige nume wöue Aktie choufe, weme nid über Ämmematt göng. 

Um 1859 ume het d Oscht-Wescht-Bahn ds Signou afe ds Land kouft. I ha lang nach de Plän gsuecht, wüu es paar Hüser hei müesse abgschrisse wärde. Es het natürlech für die Ysebahn zimli Land brucht u viu Grundeigetümer sy betroffe gsy. Signou isch denn sehr modern gsy, e Hochburg vo de Radikale. Fasch aui hei ds Land ohni z zögere verchouft. D Osch-Wescht-Bahn het o guet zaut. Dr Fritz Aebersould, dr Buur ds Schüpbach (hüt dr Hof Nr. 7 Houptstrass) het ersch grad vorhär es nöis Huus bout gha. D Gleis für die nöii Bahn sy itz aber grad hingerem Huus düregange. Ihm het d Bahngseuschaft ds Land zaut, es paar Obschtböim entschädiget u när het ihm d Bahn o no e Brügg bout übere Hundschüpfegrabe. Über 10’000 Franke het är übercho (das wäre hüt öppe 150’000 Franken). Är het das Gäud guet wöue aalege u het de grad Obligatione vor Bahn kouft. O dr Weibu Gärber z Signou het statt Bargäud Aktie u Obligatione vo dr Bahn wöue. 

Dr Johann Arm im Ried het si Spycher müesse versetze. Dä steit no hüt e chly komisch haub im Bahnport. Dr Samuel Rupp, dr Naguschmied, u dr Notar Zurflüeh hei zäme es Huus ghaa, wo genau dert isch gstange, wo d Bahn hät düre söue. Das Huus isch abbroche u es nöis Drüfamiliehuus bout worde. Die Ysebahn isch z Signou wiukomme gsy; nume i zwene Fäu het sech d Bahn grichtlich mit Grundeigetümer müesse
einige. 

Aber äbe, die Sach isch i d Hose. Es isch du uscho, dass die meischte Zeichnige für Aktie sy gfäutscht worde. D Bahn het acht Millione Schulde gha u isch bankrottgange. Wäge däm het me de vo dr «Oh-Weh-Bahn» gredt. Bärn het müesse die Sach übernäh u fertig boue – es isch e tüüri Gschicht worde. Die Radikale hei die nächschte Wahle verlore u zwe Signouer hei ihrer Aktie u Obligatione chönne aus WC-Papier bruche.

21.03.2019 :: Hans Minder, Lokalhistoriker

Weitere Artikel

D Euphorie für d Bahn isch gross gsy
Vo Früecher: Z letscht Mau hani verzeut, dass Bärn het wöue vorwärts mache mit dr Ysebahn,...
D Chiuche isch ar Maria gweiht gsy
Vo Früecher:   D Chiuche vo Signou, wie si hüt usgeseht, isch usem Jahr 1738. Denn isch si me oder...
Signou isch dr Sitz vor Landvogtei gsy
Im Herbscht wird ir Gmein Signou e Gwärbusschtelig sy, u uf dä Aalass wetti mis Buech...
 
Vo Früecher: Vom Historische här gseh, isch es meh oder weniger e Zuefau, dass mir das nöie Jahr itz...
12345678
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr