Anmelden
Löter-Köbu us em Ungerfrittebach
Zhingersch im Ungerfrittebach by Gärbersch het vo 1934 bis 1955 dr Muuser, Chesselflicker, Chacheliflicker u Chorber «Löter Köbu» gläbt. Är isch eigentlich e Schangnouer gsii, Mathys Jakob het är gheisse u isch im Septämer 1885 uf d Wält choo. Dr Köbu isch zersch mängs Jahr uf der Schwandweid gwohnt u het sech als Chesselflicker (äbe als Lööter) düregschlage. O Chorbe heig är no gleert u de het är no gmuuset. Grad riich worde isch är nid by dere Arbit, ne-nei. D Gemein het öppe gäng chli müesse luege, dass Köbu so häb-chläb über d Rundi isch choo.

Gschichtli über Löter-Köbu‘n
Löter-Köbu het gäng lut u dütlich mit sim Herrgott gredt bim Schaffe. Är isch o einisch im Äschbach obe by Wüethrichs gsi u het dert Chachugschir gheftet u Milchgschir glötet. Wie gäng, wes ds Wätter ömu hett erloubt, isch er o a däm schöne Tag vor em Puurehuus im Freie ghöcklet u het gwärchet. Drby ghört är, wys im Gade obe uf einisch het tschätteret u gschärbelet – d Püüri het ds Chachugschirr la gheie! Köbu laat sis Wärchzüg la fahre u steckt d Häng gäge Himu ueche u möögget: «Danke, liebe Herrgott, danke vielmal».

Löter-Köbu het o einisch bim Rössli-Wirt zwöi Kilo so schön schmutzige Schpäck koufft. Am angere Tag isch är wider it Rössli-Metzg u het usgrüeft, dä Schpäck sig de gar nid guet gsi, är higi grüüseli Buchwee übercho! Dr Rössli-Metzger het du gmeint, das sigi de scho kurlig, da heigi bis jetz eigentlich no niemer reklamiert, är söll doch dä Schpäck umebringe. Da meint du Köbu: «daas geiht niid, dä häni dänk scho alle gfrässe!».
O bim Muuse heige nim d Buebe vo Ramseiersch einisch e Schtreich g’schpilt. So heige nim die tonnersch Schnuderine es toots Fäärli, wo z früe isch uf d Wält choo, i ne Muusefalle gschteckt u de wieder verlochet. Wo Köbu isch cho d Falle lääre, het er das Fäärli usezoge, gschtuunet u gmeint: «es isch nid e Schäär, es isch nid e Muus, aber öppis donnersch wird scho sy». Löter-Köbu isch die letschte paar Jahr vo sim Läbe im Bärau gsii u isch dert o im 1958 uf em Fridhoof beärdiget worde.

Chacheliflicker
Chachelgschirr isch tüür gsii u d Arbitschraft billig, de het me halt früecher alls gflickt, was no irgendwie isch müglich gsii. We de halt einisch d Röschtiplatte isch verschlage gsii, het me dr Chacheliflicker müesse haa. Das si alls fahrendi Gselle gsii, wo vo Hoof zu Hoof zoge u ihri Dienschte aapotte hei. Dr Chacheliflicker het de die Röschtiplatte gnoo u die zwee Bitze wieder zämegmacht. Drzue het är nid öppe Liim gnoo, nei är het das Gschir mit ere Drahtchalmmere (em Häftli) gheftet. Drzu het är zwöi Löcher gmacht (i jedes vo de beide Teili), aber ja nid öppe ganz düre, er het äbe müesse «ufpasse wie ne Häftlimacher», dass das Loch nid dür u dür isch. De het är die Chlammere i de beide Löchere mit Lätt ver­chläbt, u die Röschtiplatte het ihre Dienscht ir Chuchi wieder chönne aaträtte.

Siehe auch die Geschichte «Muuser Godi» aus dem Buch «Bärner Märit» von Hanny Schenker-Brechbühl, Bern 1972
24.03.2005 :: Hans Minder, Lokalhistoriker, Lauperswil
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr