I ha es Heft übercho, wo e Buremaa um 1938 het dri gschribe, weli Heilchrüter är im Garte het. Da isch afe einisch d Kamille: Är schrybt, dass me das bruch für ds Beruehige u bi Mage- u Darmproblem. Aus zwöits sy im d Lindeblüete wichtig. Die syge fiebersänkend! Linde sy sowieso wichtig. So e Lindeboum cha bis 2½ Kilo Hungg liefere pro Jahr. Sis nächschte Chrüttli isch dr Baudrian. Är schrybt, dass me dä Tee müess chaut aasetze u de heig me kener Schlafproblem meh. I ha o scho gläse, das me mit de Wurzle vom Baudrian müess vorsichtig sy. We me die tüeg chätsche, wärd me bösartig. So heige d Hänker vor dr Arbit Baudrian-Wurzle gchätschet, de hei si ke Mitleid gha mit dene wo si hei müesse umbringe. Bibernelle isch o uf dere Lischte. «Bibernelle jagt verhockte und eiternde Stoffe aus dem Kehlkopf und der Lunge», schribt är. Birkebletter: die syge guet aus Tee gäge Niere- u Blaselyde, aber o gäge Rheuma u Giecht. D Brombeerbletter cha me o zu Tee verarbeite. O d Rinde vor Eiche sött me gäng ha. By Froschtbüle als Zuesatz zum Badewasser syg das einmalig! Unbedingt im Garte ghört natürlech o Änis u Fänchu. Nüt bessersch gäge Blähjige u Fieber. Viu Tee treiche – das nützt. Höiblueme sötte ir Apithek o geng sy. Me bruch das für ds Bade, für Umschleg bi Quetschige oder Rheuma. Holunder. Das hani no däicht, dass dä chunnt. Tee us de Blüete würki schyns bi Katharr u tüeg o dr Schweiss la loufe. Johannischrut darf o nid fähle. Är bruchts aus Tee us de Blüete gäge verschliimti Lunge, Mageproblem u Problem mit Niere u Blase. Ds Chörblichrut het är o kennt. Es syg guet für d Bluet-reinigung, är het sogar gmeint, dass es d Lungetuberkulose (TB) chönn vertrybe. Me chönns o uschoche u de die Dämpf gäge d Hämorrhoide ysetzte. I steue mir ds irgendwie komisch vor! Uf gar ke Fau darf im Garte o Meerrättech, Melisse u Pfäffermünze fähle! Saubei isch guet gäge Nachtschweiss, Schiisser (exgüse), Verschliimige u Grippe. Är redt hie o vom Gurguwasser, das hani o gäng eso i Erinnerig.
Die nächschti Pflanze, wo är beschribt, hani nid kennt. Är heig «Sennesbletter» im Vorrat. Das syg guet aus Abfüehrmittu. Gmeint isch äue «senna alexandrina». Ds Chrut wachst aber äue nid hie. Im Lexikon steit öppis vo Nordafrika. Hie z Europa kennt me das Mittu us Afrika scho sitem Mittuauter! Wachouderbeeri sy guet für Verdouig u Wärmueth isch es guets Magemittu. Wett Müeh hesch mit em Bisle, de nimm Zinnchrut (mir säge o Chatzewaddle). O Arnika het dä Buremaa im Garte gha, guet gäge aui Forme vo Verletzige. Är beschrybt o dr kompliziert Wäg, wie me die Arnika muess behandle, dass das öppis wird.