Heit dir scho gfüllti Chaubsohre gha?

Itze chöme mir zum Fleisch. Im Jahr 1835, wo ds Chochbuech vo dr Julie Rytz-Dick isch usecho, isch Chaubfleisch ds günschtigschte Fleisch gsy. Das Fleisch isch denn nämlech nid so beliebt gsy – es heig ke Chraft u ke Chuscht, hets gheisse. Me het ds Chaubfleisch houptsächlech zu Vorässe verchochet. Me het e Mäusosse gmacht mit e chly Zitrone oder Essig u amene guete Wysswy. Ds Fleisch chönn me o hacke u de Chrügeli mache. E chly spezieu isch das Rezäpt vo dr Frou Rytz für gfüllti Chaubsohre. Me nimmt äbe Ohre vo Chauber, schabt u putz se guet u de chöme si i Wasser mitere Fleischbrüehji uf ds Füür. Me müess se so lang la choche, bis si ganz weich syge, steit im Rezäpt. De nähm me se us dr Brühji use u löi se la chaute. De müess me Räschte vo ­wyssem Fleisch – also Chaub, Huen oder Änte – guet hacke, würze u de mit Eiwyss mische. Die Füllig chunnt de i d Ohre yche u de müess me das guet zuebinge. D Frou Ritz lat se de nachhär für ds Serviere inere Sosse la warm wärde. O die Sosse isch chly spezieu: Sie nähm e Chräbs-Sosse oder eini mit Spragle (das isch denn zimli exotisch gsy, hüt wird ja d Sauce hollandaise viu kochet).

Hingäge hüt nümme aktueu sy d Rezäpt für Chaubshirni. D Julie  Rytz-Dick het aber i ihrem Chochbuech vo 1835 es Rezäpt drinne. Hie brucht sie übrigens Safran aus Gwürz. D Hirni ­wärde de am Schluss uf enere toschtete Brotschybe am Gascht särviert. Vom Hirni giits ganz ache bim Chaub, z nächschte Rezäpt sy  Chaubsfüess mit Chrütersosse. Das hani o scho gmacht, so vier bis föif Stung muess me de die scho la choche, weme ke Dämpfer het. Wie o d Söifüessli tuet d Frou Rytz die Chaubsfüess am Schluss wieder befüechte mit Essigwasser u se de i Brotbrösmeli dräje u im Ofe no e chly la Farb aanäh. Das hani säuber o gärn u dr gross französisch Choch, Paul Bocuse, het i sim Buech gschribe, dass das sini Lieblingsspys syg. Viu Lüt hei o ganz gärn öppis an sich eifachs: Zum Byspiu Miuchris. Da hets im Choch­buech vor Julie Rytz-Dick o es Reszäpt. Das isch de nid nume es Ässe für armi Lüt. Miuchris isch i de besser Beiz no vor 50 Jahr aus Paschtetlifuwig verchouft worde.