D Hinrichtig vom Mörder Niklous Kuehn isch ufe 5. Novämber 1754 am Hochgricht z Raufli (Ranflüh) aagsetzt worde.
Är het ja dr Hans Heimbärg am Morge vom 26. Septämber im Hämubach imene Schürli miteme Stei erschlage.
Dr Mörder, wo no nid emau drissgi isch gsy, het äue scho gwüsst, was uf ihn zuechunnt: D Todesstraf.
Vor dr Hirichtig isch im Wirtshus z Raufli no es letscht Verhör gmacht worde. Dert isch äue nümme viu Nöis uscho; ömu isch nüt Wichtigs notiert worde, wo die Sach no beyflusst hät.
Dä jung Maa isch äue scho soo imene Züüg gsy, dass är nümme het gwüsst, was obe u unger isch u äue o nümme viu het chönne säge.
Ändgültig d Närve düre sy ihm sicher, wo ihm ds Urteil isch verläse worde: Dr Scharfrichter wird ihn uf d Brächi tue u dert aui Chnoche bräche. När wird är ihn miteme «Herz-Stoß» umbringe (faus das no nötig sött sy). U zum Abschluss wird dr Scharfrichter dr läblos Lyb uf ds Rad flächte u das nächär zur abschreckende Würkig z Raufli ufsteue.
Dr Landvogt vo Trachsuwaud, dr Abraham Ahasverus Tscharner isch bi dere Hirichtig drby gsy. Är schrybt zwe Tag speter uf Bärn: «Der Maleficant sei dem Scharpffrichter übergeben und laut eüer Gnaden Erkantnuß vom Leben zum Tod hingerichtet worden. Was die Hinrichtung betrifft, hat mich bedunckt der Scharpff-Richter habe sie mit keiner großen Geschwindigkeit verrichtet.»
Dr Horisbärger, wo dr Kuehn het aagstiftet füre Heimbärg ume Egge z bringe, isch zwüschezytlech o no verhaftet worde. Dr Kuehn, wo am Schluss dr Mord het gmacht u dr Gring u d Chnoche het müesse häreha, het ihn sogar no entlaschtet. Är het nämlech gseit, dass är nid gloubi, dass es dr Horisbärger ärnscht gmeint heig. So isch dr Christe Horisbärger wieder frei cho. Dä het ja es Oug uf dr Frou vom Heimbärg u vor auem uf ihrem Erb gha – zum Ziu cho isch är aber nid.
Am Heimbärg sini Frou, d Anna Müller, isch nächär o no gsuecht worde. Si isch ja die gsy, wo ume Niklous Kuehn umegscharwänzlet het, bis dä ihre versproche het, ömu z probiere dr Hans Heimbärg la z verschwinde.
Die Frou isch ab gsy, me het si nümme gfunge.
Ersch zäh Jahr nach däm Mord, auso 1764, toucht ihre Name im Ratsmanual vo Bärn ume uf.
Si heig e Samuel Harri vor Lenk ghürate. Beidi syge zur «Römisch Catholischen Religion» überträte u heige sech im Wallis niderglaa. Das isch offebar aues, wo Bärn i dere Sach het chönne usefinge. D Walliser hei nämlech ke Fiduz gha, ihri Bürgere a ds reformierte Bärn uszlifere. So het d Anna Müller im Wallis es nöis Läbe chönne aafaa. Öb si z fride isch gsy? Mir wüsses nid.