Anmelden
D Chiuche isch ar Maria gweiht gsy
D Chiuche isch ar Maria gweiht gsy Vo Früecher:

 

D Chiuche vo Signou, wie si hüt usgeseht, isch usem Jahr 1738. Denn isch si me oder weniger nöi bout worde. Vo der früechere Chiuche isch nume no dr ungerscht Teu vom Turm u d Nordwang erhaute. 1738 isch dr Bou vom Wärchmeischter Wolfgang Zehnder vo Bärn gmacht worde. Der Staat Bärn het d Chöschte vom Chor u d Gemein het ds Schiff u dr Turm müesse zale. Sythär isch gäng wieder renoviert u ergänzt worde. 

D Chiuche isch zimli sicher scho um ds Jahr 1000 dert gstange – natürlech denn no katholisch. D Chiuche het em Schloss u dr Herrschaft Signou ghört, das heisst, die Chiuche u dr Prieschter sy vom Herr vo Signou zaut worde, dä het aber drfür d Abgabe für d Chiuche chönne yzieh. Dr Herr isch de drfür nach em Tod ungerem Autar oder im Chor beärdiget worde. Das isch natürlech guet gsy, er het de weniger lang müesse im Fägfüür lyde. Im Jahr 1528, auso im glyche Jahr wie d Reformation z Bärn isch gsy, het de Bärn d Herrschaft u o dr Chiuchesatz vo Signou kouft. Dr Herr vo Diessbach, wo ds Schloss Signou denn het ghört, het d Herrschaft amene französische Generau verchouft, Bärn het de aber ds Vorchoufsrächt usgüebt. Es isch no guet, dass die das gmacht hei, süsch müesste d Signouer, d Eggiwiuer, d Röthebacher, die vo Bigle u Grosshöchschtette u die vom Buechibärg hüt
französisch parliere, voilà!

Jedi katholischi Chiuche isch amene Heilige gwidmet worde. Z Signou isch d Gottesmueter Maria d Patronin gsy, Signou isch auso e «Liebfroue-Chiuche» gsy. Usere Urkunde vo 1491 isch o bekannt, dass ufem Schloss Signou obe e Kapäue isch gstange. Die St.-Georg-Kapäue isch vom Bischof Daniel, em Gerneralvikar vom Bischof vo Konstanz, gweiht worde. Signou het aube zum Bischtum Konstanz ghört. 

Nach dr Reformation het me dr Chor o no chönne bruche: ds Chorgricht het sech dert ygrichtet, drzue isch dr Toufstei u e Abendmautisch hiehäre cho. Dr Autar het me de usegheit. 

Uf dr Nordsyte vor Chiuche isch früecher o dr Friedhof gsy. Im 1906 isch no e Teil vom Friedhof brucht worde, dr nöi isch 1880 im Hof unger aagfange worde. 

21.02.2019 :: Hans Minder, Lokalhistoriker
Meistgelesene Artikel
Immer wieder kommt es vor, dass im Leben Kompromisse gemacht werden müssen. Sei es in der...
Einige können sich vermutlich an ein Lied erinnern, das vor etwa 40 Jahren viele Fans...
Zwei Finninnen verpflichtet
Unihockey, NLA: Erstmals in der Vereinsgeschichte werden zwei Ausländerinnen für die Unihockeyvereinigung...
Der Plan für die Räumung
Räbloch: Die Räumung des Räblochs verzögert sich. Nun ist klar, dass im Herbst die...
Es hat mehr junge Hausärzte – aber  insgesamt noch immer zu wenige
Konolfingen: Heute können sich mehr junge Ärzte vorstellen, in einer Hausarztpraxis tätig zu sein...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr