Anmelden
Dert, wo dr Bach usgschüttet het
Dert, wo dr Bach usgschüttet het Ört u Näme:

D Näme vo de Gwässer sy geng bsungers intressant, wüu die sehr aut sy. Das isch o bim Schüpbach eso. Die eutischte Nennige vo däm Bach stamme usem Jahr 1250. «Schuppah» isch denn gschribe worde. Uffäuig a dere Schribwys sy sicher die zwe «p». Das het sech när no bis ids 16. Jahrhundert ghaute. Us dr Bezeichnig vom Bach isch im Louf vor Zyt zersch e Orts- u när e Familiename entstange. Dr berüehmt Dokter, dr Schüppach Micheli, het sech ja o so gschribe. Dr Familiename Schüpbach isch imene Dotze Ämmitauer Gmeinde aut beleit. Ir Gmein Hasli, gnauer im Biembach, gits es Heimet wo «Schüpach» heisst – dert isch de dr Familiename uf ds Heimet übergange.  

Weme hüt vo Schüpbach redt, de meint me ds Dorf ungerhaub vo Signou, diräkt ar Ämme. Früecher het me mit däm Wort viu meh gmeint: Ds Gebiet vom Steinegrabe, vom Feischtergrabe u när natürlech die ganzi Tauäbeni, wo früecher dr Schüpbach isch gloffe u speter dr Schüpbachkanau. 

Dass das Gebiet früecher grösser isch gsy, zeigt sech o da dranne, das me ganz obe im Feischter-grabe, das Gebiet ghört de scho zu Eggiwiu, no Ortsnäme mit «Schüpbach» fingt. Chly wyter unger, das isch de ir Gmein Bowiu, gits «im Schüpbach» u «obere Schüpbach». Sinnigerwys gits uf dr angere Syte vom Feischtergrabe no es zwöits «obere Schüpbach» u das isch de uf Signouer Bode.  

I de historische Queue toucht «Schüpbach» ersch churz vorem Jahr 1700 uf. Es isch nid nume eso, dass sech «Schüppach» zu «Schüpbach» hät gwandlet. Ganz am Aafang het me däm Gwässer nämlech «Schüttbach» gseit. Die Umformulierig vo «tt» zu «pp» fingt me o bi angerne Wörter us dere Zyt. Es git i de historische Belege sogar e Ytrag mit «Schütbach». 

Dr Ursprung vo dere Bezeichnig isch, dass es vor Jahrhunderte im Gebiet zwüsche Steine u Bowiu – wo d Wasserscheidi vor Ämme u dr Chise isch – zu viune Überschwemmige isch cho. Dere Flächi, wo d Steine u ds Grien isch blibe lige, wo d Bäch hei ache-
geschwemmt, het me «Schütti» gseit. U am Bach, wo i d Schütti louft, het me denzumale Schüttbach gseit. Bim Steinegrabe gits no hüt e Usschütti, bevor dass är i Schüpbachkanau louft.  

28.03.2019 :: Bruno Zürcher
Meistgelesene Artikel
Immer wieder kommt es vor, dass im Leben Kompromisse gemacht werden müssen. Sei es in der...
Einige können sich vermutlich an ein Lied erinnern, das vor etwa 40 Jahren viele Fans...
Zwei Finninnen verpflichtet
Unihockey, NLA: Erstmals in der Vereinsgeschichte werden zwei Ausländerinnen für die Unihockeyvereinigung...
Der Plan für die Räumung
Räbloch: Die Räumung des Räblochs verzögert sich. Nun ist klar, dass im Herbst die...
Es hat mehr junge Hausärzte – aber  insgesamt noch immer zu wenige
Konolfingen: Heute können sich mehr junge Ärzte vorstellen, in einer Hausarztpraxis tätig zu sein...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr