Anmelden
E komplizierti Ufteilerei

Itz tue nech no wyter verzeue, wies mit de Heimet im Häli-schwang isch wytergange. 

Dr Chrischte Mosimaa het dr Hof 1781 kouft, wüu är das Heimet het wöue ufteile. Är het ei Suhn gha, dr Hans, u zwo Töchtere. Die einti Tochter isch ghürate gsy u ir Teilig isch dr Stammhof vo de Mosimaa a si Grosssuhn, Christian Haldimaa, gange u dr Suhn Hans het dr nöi Hof im Hälischwang übernoh. 

Dr Chrischte Mosimaa isch e ryche Ma gsy, won är isch gstorbe. Weme das Inväntar dürerächtet chunnt me uf es Vermöge vo über zwo Millione Franke. Er het haut näbe de Höf o viu Gäut usglehnt u guet a de Zinse verdient. 

Dr Suhn Hans, wo dr Hof im Hälischwang het übercho, het ersch zimli spät ghürate u wo är 1806 gstorbe isch, sy siner Ching no z jung gsy füre Hof z übernäh. Er het no im Jahr 1802 es zwöits Burehuus la boue. Si Wittwe isch äbe ordeli jünger gsy weder är, u het das Heimet i de nächschte Jahre säuber bewirtschaftet. 1815 het d Witwe no es nöis Stöckli la boue. 

Im Jahr 1818 isch de aber d Teilig nache gsy. Eigentlech wär im Normaufau dr jüngscht Suhn dr Alleinerb vom Hof gsy, aber hie het me das Heimet ufteilt. Dr aut Hof isch a Niklous Mosimaa gange u dr nöi a si Brueder Christian. Im Vertrag isch genau greglet worde, wie das göng u wieme de i Zuekunft wöu zäme uscho. 

Zum nöie Bureguet het ds nöie Burehuus ghört, dr nöi Wohnstock, je d Heufti vom Ofehuus u vom Spycher. Ds aute Bure-guet het dr Stammhof übercho, ds Chüejerhuus u die angere Häuftine vom Ofehuus u vom Spycher. Zum Hof hei o no Auprächt (Chuerächt) ghört uf dr Aup Sunnhaule z Eggiwiu u o no uf dr Mettle u uf dr Lingeaup im Trueb. 

Ds hütige Nummer 19 Häli-schwang isch dr aut Hof. Er ghört no hüt dr Familie Mosimaa. Dr Hof mitem Nummero 20 isch hingäge im Jahr 1905 a d Familie Chipfer verchouft worde. Zimli sicher isch o, dass me 1815 dr Spycher het i nes Stöckli umbout. 1818 isch jedefous ds Stöckli dert gsy, u dr Spycher fäut im Teiligsvertrag. Me het drum müesse dr anger Spycher ufteile. 

Bim nöie Heimet Nr. 20 steit sit 1917 es Stöckli. Das isch aus erschts Huus wytumenang mit Eternit deckt worde. Dennzumale sy die «Aspeschtschiferplatte» dr nöischti Schrei gsy.

25.07.2019 :: Hans Minder, Lokalhistoriker
Meistgelesene Artikel
Wie halten Sie es mit dem Warten? -Reagieren Sie genervt, wenn Sie am Skilift, am Postschalter oder...
Es ist matchentscheidend für unser Leben, mit welchen Menschen wir uns umgeben. Haben wir...
E Ämmitauer Spezialität sy die sogenannte «Frässbedli» gsy. Fasch i...
Kevin Wüthrich ist Feuer und Flamme fürs Kochen, Essen und Trinken
Escholzmatt: Kevin Wüthrich, der als Sous-Chef bei Stefan Wiesner arbeitet, wird Ende September zum dritten...
Schräglage:   Wieder hat Thomas Lüthi in der Gesamtwertung der Moto2-Weltmeisterschaft Punkte auf...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr