Anmelden
E Wiehnachtsgschicht mit Ortsnäme
E Wiehnachtsgschicht mit Ortsnäme Ort u Näme:

Bekanntlech isch dr Jesus nid im Ämmitau oder Äntlibuech uf d Wäut cho. We das junge Paar aber hie hätti gläbt u wäge dr Voukszählig i kem Hotäu e Platz hätti gfunge, de hättis ömu viu Stäu, wo si hätte chönne drin logiere. Das zeigt sech o i de Ortsnäme: Wyt über 50 Ört hani gfunge mit däm Wort drin. 

Guet, vor meh aus 2000 Jahr het das sicher no chly angersch us-
gseh… U när wärs äue im Stau o no zimli chaut gsy – ömu we d Geburt vom Jesus am 25. Dezämber isch gsy. Da sy sech d Experte ja nid einig. Aber die katholischi Chiuche het dä Tag um 300 nach Christus aus Geburtstag vom Jesus bestimmt. 

«Jesus» chunnt hieumenang i kem Ortsname vor, aber «Christ». Bsungers im Ämmitau isch dä Name beliebt gsy. Aut beleit sy die zwöi Heimet ober u unger Christensbärg, nordöschtlech vo Truebschache. Es gyt e Ytrag vo 1378. Dert steit «Ulrich Kristiansberg». Das heisst aus, dass dr Ortsname denn schon bestange het, u dass dä Bärg no früecher amene Christe het  müesse ghört ha. Sinnigerwys heisst ds Gebiet näbedranne Heidbühl – aber mit Heide im Sinn vo Gottlose het das nüt z tüe, sondern mit chlyne Büsch, wo dert vor hunderte vo Jahr sy gwachse. Dr Personename Christe, bezeichnet nid eifach e Christ, sondern stammt vo Christoffel ab. Gross syg dr Christophorus gsy, wie dä Heilig richtig het gheisse. Gmäss dr Legände heig är ds Jesus-Ching über ne Fluss treit. So viu Christe wies im Ämmitau git, so viu Sepps gits im Äntlibuech. Dr Josef spiut ja o ir Wiehnachtsgschicht e wichtegi Roue. Ortsnäme mit Josef hani aber nume grad eine gfunge: D Kapäue am Schüpferbärg isch zwar zu Ehre vor heilige Familie bout worde, umgangssprachlech seit me aber Josefskapäue. Zur Churzform Sepp hani überraschenderwys im Äntibuech ke Ortsname gfunge, aber im Ämmitau: Sepphofstatt heisst es Heimet chly öschtlech vo Schafhuse.  Marietal isch dr einzig Ortsname, woni zu Maria ha gfunge. Drmit gmeint isch dr ober Teu vom Waudämmitau – vo Schüpfheim bis ueche uf Sörenbärg. D Bezeichnig geit uf ne Legände zrügg. Drby syg e Marie-Statue ir Zyt vor Reformation usem Bärner Oberland grettet u z Sörebärg ufgsteut worde – dert, wo hüt d Chiuche Sankt Maria steit.


Queue: «Ortsnamenbuch des Kantons Bern», «Orts- und Flurnamen des Amtes Entlebuch»



19.12.2019 :: Bruno Zürcher
Meistgelesene Artikel
Nein, als Aufruf zum zivilen Ungehorsam sollte meine Kolumne jetzt bitte nicht verstanden werden....
Auszeit: Menschen, die mit sich selber reden, führen sogenannte Selbstgespräche. Ein Mann...
Gegen nasse Böden
Schangnau: Hunderte Hektaren Land wurden einst mit Drainagen entwässert, um die Parzellen besser...
Waud, Houz, Forst – drü stämmegi Wörter
Ört u Näme: Chürzlech hani erklärt, dass me viune Wäuder früecher ganz angersch het gseit,...
Wie Lebensmittelgeschäfte arbeiten
Emmental/Entlebuch: Läden, welche Lebensmittel verkaufen, mussten in den letzten Tagen verschiedene...
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr