Anmelden
Marazzis hei z Signou aagfange

D Firma Marazzi stammt o us Signou. Dr Lorenzo Marazzi het dert i de 1920er-Jahr mit zwene Handlanger aagfange. 

1907 isch dr Lorenzo Marazzi vo Clivio ir Lombardei uf Signou cho. Ygwanderet isch är scho 1902. Z Langnou het är aus Pflaschterbueb gwärchet. 

1913 het dr Lorenzo Marazzi d Tochter vom Maschinefabrikant Liechti us Schüpbach ghürate! D Maschinefabrig Liechti isch de speter uf Langnou züglet, wo me se no hüt fingt. Auerdings ghört das Ungernähme mittlerwyle zumene usländische Konzärn. 1917 het d Gmein Signou dr Lorenzo Marazzi ybürgeret. Grad ganz ohni Opposition isch das aber nid gange. Es isch gfragt worde, ob e Itaujäner, wo z Italie bim Erschte Wäutchrieg nid id Armee heig wöue yrücke, de ir Schwyzer Armee zueverlässig würd diene? Me isch de aber dr Meinig gsy, das göng scho u het ne ybürgeret. Vo 1917 bis 1918 isch är de tatsächlech im Gränzdienscht vor Schwyzer Armee gstange. I de nächschte Jahre het dr Lorenzo Marazzi houptsächlich z Signou diversi Nöiboute gmacht. Är het gäge d Tradition vom Ämmitau d Hüser us Stei u Beton bout. Ds eutischte Huus, won i weiss, dass es vom Marazzi isch boue worde, isch das vo 1913, d Dorfschtrass 49, wo me o «die auti Bank» seit. 1921 het är de das Huus näbem Bäre bout, wo am Schluss d Raiffisebank drinn isch gsy. 1922 het är a dr Dorfstrass 79 sis eigete Huus bout. 1930 het d Firma Marazzi d Garage vom Bus-
ungernähme AOE bout, dert wo hüt dr Coop drinn isch. Uf minere Lischte sy no es paar angeri Hüser; bi aune handlet sechs um Steihüser, auso angersch bout, aus me das vorhär kennt het. 

1945, nachem Ändi vom Zwöite Chrieg, isch d Firma ganz stark vergrösseret worde. Schlussändlich hei meh aus 500 Lüt füre Marazzi gschaffet. Nachfouger ische de si Suhn Hugo worde, der Grosssuhn Bruno Marazzi het de d Firma im Jahr 2006 a
d Losinger-Gruppe verchouft, wüu niemer ir Familie het wöue wyterfahre. Hüt ghört das aues zunere französische Firma. 

14.11.2019 :: Hans Minder, Lokalhistoriker

Weitere Artikel

Marazzis hei z Signou aagfange
D Firma Marazzi stammt o us Signou. Dr Lorenzo Marazzi het dert i de 1920er-Jahr mit zwene...
Vo Becke, Täfeli u zäije Chüechli
Z Signou hets früecher e Hüüfe Handwärcher u Lädeler gä. Dr...
Wi d Evangelischte  uf Kanzle sy cho
Itze chöme mir zunere Gschicht, woni zersch nid ha wöue gloube, aber sie stimmt...
 
Vo früecher: Tage wärde chürzer u ds Buech über Signou wird gäng dicker. Im Moment gits ke...
12345678
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr