Anmelden
Au sächs Jahr het ds Gricht züglet

D Ortschaft Waud isch ds Erschte, wo eim begägnet, we me vo Marbach här uf Schangnou chunnt. Tatsächlich isch dä Wyler ursprünglech o ds Zäntrum vom Schangnou gsy. Schangnou isch zäme mit em Gummetau – wo zur Gmein Trueb ghört – eis Gricht gsy. D Grichtssässe sy de äbe aube im Ort Waud zämecho. Normalerwys isch das wäutleche Gricht imene
Gaschthof zämecho – nid aber im Schangnou. Es het dert nämlech gar kes Gaschthuus gää. Das im Dorf, dr Löie, isch ersch um ds Jahr 1810 bout worde u im Waud isch es eso gsy, dass me au sächs Jahr dr Sitz vom Gricht nöi heig vergää. Konkret heig eifach eine vo dene acht Burehöf dert ds Gricht müesse la tage. Was het aues derzue ghört? Afe einisch het die Burefamilie die Herre Richter müesse beherbärge. Dr Buur het drfür i dene sächs Jahr dörfe wirte, het aber de o müesse Lüt ufnäh, wo hei wöue übernachte. Sicher isch, dass o dr Landschryber vo Trachsuwaud aube dert übernachtet het. Är het uf au Fäu gschribe, dass är im Jahr 1783 ufere Wanderig dür ds Ämmitau mit zwene Notarsghiufne im Waud heig übernachtet. 

Scho zur Chloschterzyt isch so es Gricht gsy. Me het e Urkunde vo 1471, wo das bestätiget. Aber speter syge de hüüfe Lüt gstorbe u Schangnou heig nümme so viu Lüt gha, dass es eigets Gricht wär nötig gsy. 

Ersch im Jahr 1563 hei du d Lüt vo Schangnou bi de Gnädige Herre z Bärn nachegefragt, ob
si äch das Gricht wieder dörfte yrichte. D Begründig isch gsy: «das Schangnouw uss gottes gnaden an Lüthen und Güteren dermassen zugenommen», dass me itz wieder es Gricht chönn yrichte. Das isch de vo Bärn o gnämiget worde. 

Das Huus, wo bis vor es paar Jahr d Wirtschaft im Waud isch gsy, exischtiert öppe sit 1880. Vorhär isch dert e Beckerei gsy. Dr Christian Hadorn vor Buech-
hütte het dert mit em Wirte aagfange. Jahrelang heig är dert gwirtet. Me verzeut sech no hüt vo däm Maa, wo enorm gross syg gsy für si Zyt. Är syg im Jahr 1936 gschtorbe u dr Hans Hadorn heig de d Wirtschaft überno, u de nachhär ds legendäre «Hadorn-Rösi». Unger ihrer Herrschaft isch d Wirtschaft im Waud wytume bekannt worde, bsungerbar wäg de Güggeli, wo si wie ke Zwöiti heig chönne mache. D Gästebüecher hei überläbt u wärde de im Heimatbuech vo Schangnou es
bsungerigs Kapitu übercho. 



20.02.2020 ::

Weitere Artikel

 
Vo früecher: D Ortschaft Waud isch ds Erschte, wo eim begägnet, we me vo Marbach här uf Schangnou...
Wie usem Mäucher  e Chäser isch worde
I wott nech no chly wyter verzeue, vom Läbe vom Hans Gärber, wo vo 1856 bis 1932...
Dr Föifliber het de äbe nid glängt
Im Summer 1871 isch Chrieg gsy zwüsche Dütschland u Frank-rych u die erwachsene Manne sy...
 
Es isch zimly gnau zwöuf Jahr här, woni afe einisch imene «Vo Früecher»...
12345678
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr