Gschichte rund um Waudhus

Im Waudhus bi Lützuflüeh het es Ofehüser u Wöschhüser gäh. I de Burehüser het me lang kener Öfe gha für Brot z bache. Drzue isch cho, dass me Hefi im Ämmitau nid geng het chönne choufe - weme de mau het gha, de hei de d Froue im Ofehüsli grad viu chönne bache. D Chäserei isch bis 1916 vo 19 Bure betriebe worde, wo Aateile hei gha. Ersch denn isch d Chäsereignosseschaft gründet worde. Dr Aubert Gygax in Flühle u dr Jakob Wälti im Waudhus sy die beide grösschte Gnosseschafter gsy. D Chäsereignosseschaft isch hüt glöscht, d Chäserei verchouft u ines Wohnhus umgwandlet. Aube hets öppe gheisse, dass die Chäserei syg ds Vorbiud gsy für d Chräserei i dr Vehfröid. Das isch aber zimli sicher nid richtig. Im Gmeinsarchiv vo Trachsuwaud sy d Protokou vo dr Chäserei Chramershus. We me dert d Protokou list, fingt me genau das, wo dr Gotthäuf nächär het ufgeschribe. O dr Hof Nr. 17 het dr Familie Chipfer ghört. 1914 isch dert d Schüür abbrönnt u die ganzi Viehherde (22 Stück) isch im Stau verbrönnt. Ds Neuhus isch wägem Johann Bärtschi bekannt worde, wo dr Boumwachs het erfunde. Dank däm Wachs het me de besser chönne Böim zweie, wüu me de d Wunde het zuegsaubet. Hüt no bekannt isch natürlech d Dahlieschou, wo im 1929 het aagfange (jedefaus isch das ds eutischte Inserat, woni gfunge ha). 1898 het dr Johann Bärtschi o e Gasthof la boue. Im Waudhusbärgli, wo hüt dr Frou Abt ghört, isch dr Emanuel Friedli uf d Wäut cho. E chly näbem Waudhus isch dr Houerthof. Dr Hof het dr Name vo dr Familie Houert, wo um 1800 ume dr Hof het gkouft u denn o ds Heimaträcht vo Lützuflüeh het übercho. 1914 isch uf em Hof es Füür usbroche, vermuetlich dür Brandstiftig. 19 Chüe, 4 Guschti u ds ganze landwirtschaftliche Mobiliar isch verbrunne. O es Stöckli isch ganz abbrönnt. Vo Houeters isch dr Hof de über d Familie Bracher hüt bir Familie vo Wurstemberger.