Hie isch mit frömdem Gäut zaut worde Wüu d Schwyz zur latinische Münz-Union het ghört, het me hie o ohni Problem mit ussländischem Gäut chönne zahle. Im Ämmitau isch bsungerbar ds Münz vom Chiuchestaat z Rom beliebt gsy, wo dr Papscht Pius IX isch abbiudet gsy. Dä het nämlech am Wase-Dokter Zürcher glyche – oder umgekehrt. U dr Wase-Dokter het natürlech bhouptet, är syg uf dene Münze u nid dr Papscht!
Näb de offizieue Mitglieder vor Währigsunion hei no mehreri Länder süsch mitgmacht. Die Münze – öppe us Spanie, Ru-mänie oder Finnland – fingt me de aber relativ säute. Ganz exotisch isch, dass Venezuela ihrer Münze vo 1879 bis 1965
o genau nach de Vorschrifte vor Münzunion het prägt!
Dank däm Trick mit dere Münzunion isch es glunge, gäng gnue Münz im Umlauf z ha, ohni dass me e Nationaubank u Banknote hät brucht. Bis 1881 hei nume d Kantön Banknote dörfe drucke u verteile, ersch nach däm Datum het der Bund erschti Vorschrifte für so Banknote gmacht, het aber säuber kener druckt – das hei wyterhin usschliesslech d Gschäfts- und Kantonalbank überno. D Lüt hei däm papierige Gäut aber nid rächt trout. Aasteu vo de Banknote isch ir Schwyz meischtens mit Guwd-münze zaut worde. Zum Byspiu mitem «Napoleon». Das isch die französeschi Guwdmünze gsy mitem Biud vom Cheiser Napoleon III. Dä isch e guete Fründ vor Schwyz gsy, schliesslech isch är z Arenebärg im Thurgou ufgwachse u het sogar o ir Schwyzer Armee dient.