Anmelden
Wie d Schangnouer zu ihrere Chiuche sy cho

D Chiuche vo Schangnou isch im Jahr 1618 bout worde. Vor dr Reformation isch Schangnou u Marbach ir glyche Gmein gsy. Imene Dokumänt vo 1315 gseht me aber, dass Schangnou e Kapäue het gha. Dr Werner vo Brandis het für ds Chloschter Trueb u drmit o für Schangnou die wäutlechi Macht gha. D Schangnouer heige vo ihm verlangt, dass me die Kapäue tüeg weihe. Drzu hät dr Bischoff vo Konstanz ids Schangnou müesse cho, wiu e Teil vo de hütige Kantön Bärn u Luzärn zu däm Bischtum hei ghört. Ds Chloschter Trueb het das nid wöue ha. Einisch afe hätte si die müsse ungerhaute. U de hät ds Chloschter o öppe e Mönch müesse hingere schicke, für dert d Mäss z läse. 

Es isch bis zum Jahr 1401 gange, bis dr Bischoff afe einisch e Kapäue z Marbach het gweiht. Vorhär hei d Schangnouer auso uf Trueb müesse für a d Mäss. 1470 het Luzern u Bärn de ändlech d Gränze fescht verybart: Schangnou zu Bärn; Marbach zu Luzärn. 1524 isch d Chiuch-
g-mein Marbach/Schangnou vo Trueb abtrennt worde u isch e eigeti Pfarrei worde. Vier Jahr später isch de d Reformation cho u die Gmein Schangnou-Marbach het müesse trennt wärde. Schangnou isch de wieder zu Trueb cho u dr Pfarrer vo Trueb hät regumässig o ids Schangnou hingere müesse ga. Das het natürlech nid gäng klappet. Hie u da het dr Pfarrer vo Röthebach müesse ushäufe. Eggiwiu het denn no gar nid existiert, das isch denn no e Teil Signou gsy. 

1594 isch de doch e eigeti Gmein Schangnou gründet worde. I de Ratsmanual vo Bärn steit, dass me um 1524 mit em Bou vor Chiuche im Schangnou heig aa-gfange. Ab 1536 muess die Chiuche gstange sy. Isch ächt die auti Chiuche o dert gsy, wo sie hüt steit? Ender nid. Das, wiu dr Wäg vom Dörfli Waud z gradem Richtig Bumbach isch gange. Genau dert, wos übere «Pass» geit, gits Orte wo Chirchegg u Chirchbüeu heisse – das cha ke Zufau sy.  

Der Bou vor hütige Chiuche isch nid nume wäge der Jahrzau ar Chiuchemur bekannt, nei, o der Landvogt vo Trachsuwaud het i de Abrächnige vo 1618 d Bouchöste drinne. D Stadt Bärn het nämlech o 666 Pfund zaut. Ins-gsamt het die Chiuche 1232 Pfund kostet. Drby sy aber ds Krüz uf em Turm, d Fäischter u d Glogge nid drby gsy. Die sy äue gspändet worde.

 

19.03.2020 :: Hans Minder

Weitere Artikel

Stüüre hei viu ir Nachbargmein zaut
Woni im Latärnegrabe ha gforschet, isch mir ufgfaue, dass me im hingere Teu vom Heimisbach d...
 
Dr Heilig Oswaud isch nid nume z Ängland, sondern o uf em Kontinänt bekannt u...
 
Dr Heilig Oswaud isch nid grad e Heilige, wo me im erschte Momänt a ds Ämmitau...
 
Im Latärnegrabe im Heimisbach gits d Schattsyte u Sunnsyte. Gömer z ersch uf d...
12345678
Wochen-Zeitung
Brennerstrasse 7
3550 Langnau i. E.
Tel. 034 409 40 01
Fax 034 409 40 09
info@wochen-zeitung.ch
Redaktion: 034 409 40 05
Öffnungszeiten:
Montag - Freitag
07:30 - 12:00 Uhr
13:30 - 17:00 Uhr