D Poscht het o Lüt transportiert

1849 het es ir ganze Schwyz nume 1500 Poschtsteue gha. Ganzi 2800 Mitarbeiter sy 1850 bir Poscht aagsteut gsy. Im Ämmitau hei nume grad Sumiswaud, Langnou, Truebschache u Signou e Poscht gha. Me het im Jahr 1850 zum erschte Mau zeut, wie viu Briefe imene Jahr sy verschickt worde. Es sy 15 Millione Briefe gsy. Tönt nach viu – es sy aber nume grad sächs Briefe pro Person u pro Jahr! Die Poscht isch de gwachse. Im Jahr 1912 hets de scho 4000  Poschtsteue gha. U was die für ne Service het gha! Bis zu sächs Mau im Tag het die d Poscht brunge u zwar jede Tag. Ersch im Jahr 1924 het me bschlosse, dass dr Briefträger am Sunndig nid uf Tuur muess. Ds Wichtigschte ir Aafangszyt sy d Personetranspört gsy, nid Briefe u Päckli.


Dr Poschtkutschedienscht isch lukrativ gsy u d Billie sy extrem tüür gsy. E Normaubürger het das nid vermöge. D Poscht het o ke Konkurränz gha. D Bahne sy ersch nadisnah ufcho. D Poscht het das ganz gschickt gmacht. D Ross u d Fuehrhauterei sy privat gsy, nume dr Poschtillion (das isch dä, wo zu de Passagier u dr Poscht het müesse luege) isch e Beamte vor Poscht gsy. Mit em Hörndli het är de d Aakunft vor Poschtkutsche aagmäudet. Das mache ja d Poschtouto hüt o no. Ds berühmte «Tü – Ta – To» kennt hüt no jede. Im Ämmitau isch d Houptlinie die vo Bärn uf Luzärn gsy, mitem Postwächsu bim «Hirsche» z Langnou. O vo Burtlef uf Langnou sy Verbindige gsy u vo Signou uf Eggiwiu. D Poschtkutsche vo Wigge uf Schangnou isch vo Bedütig worde, wo ds Chemmeribodebad isch berüehmt worde. D Schangnouer hei sogar no e sanierti Poschtkutsche vo denn. E nöji Entwicklig isch de churz nach der Gründig vor Poscht cho, dr Telegraf. Im Jahr 1851 het dr Nationaurat bschlosse, die nöji Erfindig dr Poscht z übergää u das zur öffentliche Sach z mache. Me het sech für ds Morsesyschtem entschiede. Für e Bou vo de Leitige het me müesse  e Ussländer haa, wüu das ir Schwyz niemer het kennt. Am 15. Juli 1852 isch ds erschte Telegram vo Züri uf St. Galle verschickt worde. Ändi 1852 isch ds Netz ir Schwyz i Betrieb gno worde.

21.03.2024 :: Hans Minder