Bluet isch usse ar Wang vom Schürli achegloffe. Das het d Anna Fuhrer früech am Morge vom 27. Septämber 1754 gseh. Scho e Tag vorhär isch ihre dert öppis ufgfaue: Wo si am sächsi am Morge bi däm Schürli im Hämubach isch düregloffe, für wyter hinger ga Chüe z mäuche, het si öppis ghört ächze. Daheim heig si das dr Muetter u de Brüetsche verzeut – die heige se aber nume usglachet.
Itz aber, wo die 18-jähregi Tochter das Bluet het gseh, isch si schnuerstraks zum nächschte Huus gange u het ihri Beobachtig gmäudet. Dr Ueli Gärber, wo dert het gwohnt, isch mit dr Anna Fuhrer zrügg zum Schürli. Är het e Leitere aagsteut, ds Töri miteme Bieli ufgmurgset u dert e tote Maa gfunge!
Itz isch klar gsy, was die jungi Frou am vordere Morge het ghört ächze!
Dr Ueli Gerber het dä gruusig Fund sofort am Schaffner vo Trueb gmäudet. Am glyche Tag, auso am 27. Septämber, het dr Landvogt Tscharner vo Trachsuwaud es Schrybe übercho, «dass in einem Scheürli im Hämmelbach Gricht und Kirchhöri Trub ein unbekannter Mann lige, der gewalttätiger Weiss vermordet oder getötet worden.» Dr Landvogt het e Delegation ufbotte, wo dr Tatort am Tag druf isch ga ungersueche. Gleitet worde isch die Begehig vom Notar u Landschryber Emuanel Ernst junior. Hüt sicher no viu e Begriff isch eine vo de Rächtsmediziner, wo i das Schürli isch bsteut worde: «Herr Doctor Schüppach» – dr «Schüppach Micheli». Aber o dr Christen Liechti isch ufbotte worde – «beyde geschworene Wundärtzten von Langnauw.»
Zersch isch die toti Person genau beschribe worde, me het ja gar nid gwüsst, wär dass das isch. Dä Maa isch «von wohlbesetzter Statur» gsy u het siner schwarze, krüselete Haar churz gschnitte gha. D Ärzt hei o gseh, dass dä Maa «Düpfle» vor Blattere het gha u süsch die einti oder angeri verheilti Wunde.
E erschte Hiwys, wo dä Maa chönnt härcho, het sech us de Chleider ergä. Die syg «von sauberem blauwen oberländischen Zeug auff Oberweiler Moden».
Dr Micheli Schüppach u dr Christen Liechti hei die Lych richtig obduziert u sy zum Schluss cho, dass me «auff der lincken Seithen am Kopff auf dem Ohr die Hirnschalen in zwey Stück geschlagen hatte, also zu glauben, daß solchen in zwey oder drey Streichen geschehen sey.» Wo die zwe Ärzt d Hirnschale heige furtgno gha, syg e «vollkommene Zersprengung der Pia Mater und aller Geblüthsgefäßen auff der rechten Seythen befunden, welches sie als vollkomlich tödtlich angesehen und erachtet».
Wär dä Tot isch gsy, hei si no nid gwüsst. Drfür isch gly druf e Maa i ds Visier cho, wo dr Täter chönnt gsy sy. Aber das chöit Dir ir nächschte Usgab läse.