Die, wo wüsse, dass ig Rezäpt sammle, wo us em Ämmitau chöme, schicke mir de öppe so Menü u Rezäptbüecher vo früecher. Ds eutischte Bärner Chochbuech, woni ha isch vo 1750. No intressanter sy aber Rezäptsammlige, wo Lüt säuber gmacht hei. Dert fingt me Sache, wo zu dere Zyt sy kochet worde. Chürzlech hani o wieder e Kaländer übercho, wo aber ganz hüüfe Rezäpt sy ychegschribe u ygchläbt worde. Dr Kaländer isch vo 1958 u das, wo datiert isch us Heftli u Zytige, isch so us de Sächzger u Sibezger. Ganz spannend bi dere Sammlig isch, dass es gar kes klars Konzept git, es chunnt eifach eis Rezäpt nachem angere. Ganz am Aafang isch e Zytigsusschnitt vom 28. Jäner 1955. Dert wird beschribe, wie me
Magewurscht über Jahre cha inere Steiguetstande ylege. Me muess nume Öu drzue gä. D Ysändere schrybt, dass si Rapsöu nähm, das chönn me o nach Jahre gäng ume für das bruche. Me müess de nume die Magerwürscht usem Öu fische, de abwäsche u guet tröchne u de chönn me die ganz normau choche. Rapsöu, muess me vilich no säge, isch zu dere Zyt no bitter gsy. Ersch ab 1970 isch settigs, wie me hüt kennt, ufcho. U Bärndütsch het me däm übrigens Levatöu gseit. Verchouft het me das nöie Rapsöu denn ungerem Name «Livio». Ds nächschte Rezäpt isch «ybachne Späck». Dr Vorschlag: Härdöpfu raschple u usdrücke, de mit Mäu, Ei, Sauz u Majoran zumene Teig chnätte. Dä Teig de uströhle u dopplet so grossi Egge useschnyde wie d Späckschybe syge. De müess me dr Späck ufeTeig lege u de mit em Räschte yklappe u das de ire Pfanne oder im Bachofe la usbache. Tönt nid schlächt! Aber i räche lieber nid nache, was das a Kalorie het! E chly weniger feiss isch ds nächschte. Hie het die Frou im Kaländer ufgschribe, wie me «Rote Randen» (auso Rätech) ymacht u sterilisiert. Es het i däm Kaländer o medizinischi Sache: Füre Hueschtetee het si no Hundsfett brucht. Das Fett isch mit Hungg u Härdöpfeler (je 1/3) z mische u de göng dr Hueschte furt. Wyter geits ume mit öppis Währschaftem: Si schrybt, dass si e Servela-Wurscht tüeg i fini Redli schnyde, nachhär Härdöpfustock nähm u de lagewys Stock u Redli ine Platte tüeg lege u de das im Bachofe bache. O ds Süesse muess die Frou gärn ha gha: E ganzi Zilete vo Rezäpt sy drby. So öppe e Ome-lette us Rys. 30 Gramm Rys u drümau so viu Miuchwasser la choche bis ds Rys weich isch u de die Sach e chly la chüele. Drnah chunnt i die Rysmasse e chly Sauz, Zucker, Wybeeri, eis Ei, zwe Ässlöffu Mäu, Zitronerinde u Saft. Die Sach inere Bratpfanne guwdgäub brate, chly Zucker u Zimmet drüber u fertig isch die Sach. E Guete!