Si hei dr Härd ueche gschuflet

Dank Ortsnäme chame i ne Zyt luege, wo lengschtens düre isch. Anere Zyt, wo no ganzi Zilete Lüt uf de Ächer gwärchet hei – zum Byspiu ufem «Schufelacher» bi Herufinge. Dä isch nämlech e chly stotzig, u wäge däm het me müesse dr Härd uecheschufle. Die Bezeichnig isch scho aut. Imene Urbar vo 1498 isch «am schuffelacher» notiert worde u das müessti ar Beschribig nah, dä bi Herufinge sy. Eso Schufelächer fingt me i historische Dokumänt no ab u zue. Z Hütlige, z Wikartswiu oder bi Aeschle, wie 1385 isch notiert worde: «Einen acher zu den Birboemen zu Eschelen in der parrochya von Diesbach, stost an den Schufelacher» – dä Acher isch auso bi de Bireböim bi Aeschle gsy, wo zur Herrschaft Diessbach het ghört. Wyter fingt me o historischi Beleg, wo eifach «Schufle» steit. «Vf der schuflenn» isch imene Urbar vo 1531 e Ort z Nieder­hünige beschribe worde. Dert weisi nid genau, wo dass dä Ort isch, wäge däm weissi o nid genau, warum dä eso isch benamset worde. Wes nid grad e Acher isch, wo ds Wort Schufle im Name het, isch d Dütig vo dene Ortsnäme sowieso nid eifach. Näbscht däm, dass dert Lüt gschuflet hei, isch nämlech o müglech, dass es dert es Wasserrad mit Schufle het gha, dass imene Waud ds Houz für Schufle isch grüschtet worde – oder, dass die Gägend vo dr Topographie här usgseht, wie dert eine mitere riesige Schufle eis hätti dri ghoue. Eso chönnti d Bezeichnig «Schufubüu» entstange sy. Eso heisse drü Heimet ufere Ahöchi, wo zur Gmein Lützuflüe ghört – u das isch scho cheibe lang eso: «Schuophelbovl» steit imene Dokumänt usem Jahr 1280, wo süsch ds meischte uf Latinisch gschribe isch. Die hütegi Schrybwys «Schaufelbühl» toucht z erschte Mau i de Amtsrächnige vo 1728 uf, mitem Vermerk, dass dä Bsitz zum «Amt Brandis» ghöri. Intressanterwys fingt me o z Marbach es Heimet «Schufelbühl». Dert isch es äben – es het auso ke Bühl u es isch nüt gschuflet worde. Wohär chunnt de die Bezeichnig? Ganz eifach, e Schufubüehler vo Lützuflüe isch dert häre «usgwanderet». Unger angerem isch e «Christiann schuffenbuel» aus Bsitzer erwähnt.