1901 bis 1952 isch d Poscht z Langnou ar Dorfstrass 4 gsy. / Bild: zvg
Mit dr Zyt sy geng wie meh Briefe verschickt worde – elektronischi Poscht hets ja no nid gä. I ha da Zahle vor Poscht z Langnou, wie viu Poschtsache dass dert sy ufgä worde. Z Maximum isch im 1969 registriert: Denn sy z Langnou 15 Millione Briefe u 130´000 Päckli ufgä worde. Verteilt het me de sogar fasch 3 Millione Briefe u 170´000 Päckli – es isch auso no meh uf Langnou gschickt worde aus umgekehrt.
Drzue isch no dr Versand vo dr Zytig, am Ämmitauer Blatt cho, wos denn no het gä. Das aues zäme het so viu Poscht gä, dass me Langnou e eigete Poschtstämpu het gä. So het ds Poschtpersonau d Zytige, wo im Huus vis-à-vis sy druckt worde, grad chönne abstämple. Frankiermaschine hets denn no kener gä.
Nachem Zwöite Wäutchrieg isch es de bi dr Poscht z Langnou mitem Platz wieder prekär worde. Me het nach Bouland gsuecht, fürne nöji, grösseri Poscht. Im Frühlig 1951 het me de mit de Bouarbeite bim Bahnhof unger chönne aafa u sitem 25. Ougschte 1952 isch d Poscht am hütige Standort.
Näbscht em Büro z Langnou het es i dr Gmein Langnou no wyteri Poschtbüro gä: Scho sit em Jahr 1873 eis im Bärou, sit 1921 es Poschtbüro ir Gou u sit 1925 eis im Oberfrittebach. Die sy mittlerwyle wieder aui zue gange, nume d Poscht z Langnou gits no. Dr Poschthauter Roth het es eigets Poschtmuseum gha, das Materiau isch hüt im Chüechlihus.
Im Eggiwiu hani d Poschtgschicht o scho düregno. Dert faht das aa im Jahr 1846, wo im Sauzhuus die erschti Poschtablag isch eröffnet worde.
Dr Chrischtian Stettler, är isch Sauzwääger u Chrämer gsy, het das überno. Är het die Poscht drü Mau ir Wuche müesse vertrage u het für dä Dienscht e Jahreslohn von 116 Livres übercho. Die «Livres» sy Pfund gsy u wo me im 1853 het dr Schwyzer Franke ygfüert, isch so ne Livres öppe glych viu wärt gsy wine 5-Franke-Münze. Drum säge mir dene gäng no «Föifliber».
1863 het me e Poschtgutsche organisiert, wo vo Signou über Eggiwiu uf Röthebach isch gfahre – u wieder retour natürlech. 1868 isch der Sauzhändler Stettler pensioniert worde u dr Ueli Haldimann, Notar u Gmeinsschryber, het dr Poschthauter o no überno. Bi dere Glägeheit het me «Eggiwyl» no grad i «Eggiwil» umgnamset.