«Stüehlige» ligt am Rand vo Grüenematt. / Bild: Bruno Zürcher (zue)
Dr Ortsname «Stüehlige» tönt im erschte Momänt nach däm Möbu, woni grad druffe hocke. U «Stüehlige» isch ganz exklusiv: Ir ganze Schwyz gits das nume a eim Ort: Z Grüenematt am Rand vom Dorf. Dert heisst es Heimet eso u es git de no am Hoger obe ds «Stüehligeweidli» u no wyter obe dr «Stüehligebärg». U das isch scho lenger eso: «Die Stülingen matten» isch zum Byspiu scho 1569 im Urbar vo Trachsuwaud notiert worde. U i de Amtsrächnige vo 1797 fingt me «Stühligenaker». Es isch guet müglech, dass dä Ortsname no euter isch u zimli sicher miteme Stueu nüt z tüe het – ender mitem Familiename «Stuelinger». Das isch itz nid grad das, wo me aus typische Ämmitauer Name cha bezeichne. Das isch es auts Gschlächt us Bärn, wo scho im 13. Jahrhundert erwähnt isch. Es isch müglech, dass die bi däm Land z Grüenematt hei d Finger dinne gha u das wäge däm zu dere exklusive Bezeichnig isch cho. Wemer scho bi ender säutene Familienäme sy: «Stuffel» isch o so eine. Dr Heimatort vo dere Familie isch Alchistorf u Seebärg. Warum ig das hie schrybe? Wüus z Rüegsbach d Ortsbezeichnig «Stuffelhus» – aus «ds Huus vor Familie Stuffel» – git. Oder villecht müessti schrybe: het gä. I de hütige Charte fingt me dä ömu nümme. Hüt heisst das dert «Kirchweg». E dritte Familiename, wo hie guet ychepasst, isch: «Streit». Dä isch o nid typisch ämmitauisch. D Heimatorte fingt me z Bärn u drum um u när o no i de einstige Ämter Seftige u Thun. Scho imene Dokumänt usem Jahr 1547 erwähnt isch «Stritgrabe». Wüu dä Bach ar Gränze vo de Gmeine Oberburg u Chrouchtu ligt, isch es guet müglech, dass dert öppis isch zangget worde. Wes bir Ligeschaft «Strittli» ir Gmein Schüpfheim e Strit het gä, isch das sicher länger här: Die het scho 1646 eso gheisse «Stritli». D «Strithalde» ir Gmein Röthebach heisst äbefaus scho lang eso. E «Uolricus de Strithalton» isch bereits 1324 erwähnt. Öb die Bezeichnig vomene Stritt oder vom Familiename chunnt, weiss i nid genau. Dr Familiename syg aus Bezeichnig für ender stritluschtegi Mönsche entstange. Aber mir wei nid zangge.