Früecher isch ja Signou dr Houptort vom Ämmitau gsy. Itz gömer zum hütige Houptort Langnou. Bir Voukszählig vom Jahr 1764 isch uscho, dass Langnou viu meh Ywohner het gha, weder Burtlef oder Thun. Me het nämlech z Langnou 2894 Ywohner zeut, Bärn isch dr gröscht Ort gsy mit 13´681 Lüt. Nach Bärn isch Biel cho, de Oberdiessbach u Herzogebuchsi. Sumiswaud het mit 3100 Ywohner grad no Langnou möge. I ha leider d Zahle vom Waadtland u vom Aargou, wo denn ja zu Bärn hei ghört, niene gfunge, aber im Stammland vor Republik Bärn hets 18 Ortschafte gä, wo meh aus 2000 Ywohner hei gha. Im Ämmitau sy das gsy: a föifter Steu Sumiswald, a sächster Steu Langnou, a zähter Steu Grosshöchstette, a füfzähter Steu Trub. Hüt ender grossi Ortschafte wie Langethau oder Burtlef sy nid id Nechi vo 2000 Lüt cho. D Fischer-Poscht het de drum um ds Jahr 1800 z Langnou e Poscht ygrichtet u d Poscht-gutsche uf Luzärn het z Langnou d Ross gwächselt. Das syg im «Hirsche» gsy, heissts. Dr «Bürger Johann Lüthi», Privatlehrer, het dr Uftrag übercho, einisch ir Wuche mit Ross u Wage uf Bärn z reise u dert d Poscht für Langnou ga zhole. Är isch findig gsy u hets eso ygrichtet, dass är no es paar Passagiere het chönne mitnäh u drzu o no Platz isch gsy für es paar Päckli. Für das z Organisiere het me ihm pro Jahr 350 Helvetischi Franken zaut. 1800 isch ja Bärn e Teil vor Helvetische Republik gsy u me het sech müesse mit «Bürger» aarede. O nach dr Franzosezyt isch Langnou dr Poschtort blibe, bsungerbar, wüu mit dr Gründig vom Amtsbezirk Signou dr Amtssitz uf Langnou isch cho u me ds Schloss z Signou verchouft het. D Fischerposcht isch de 1832 vom Kanton übernoh worde u d Ablag z Langnou isch am 1. Ougschte 1832 zum Poschtbüro worde. Dr erscht Poschthauter vo Langnou isch e Christian Röthlisbärger gsy. 1845 isch das Amt a Rächtsaawaut Johann Lüthi übergange. Dä het im Arbeitsvertrag d Ufgab übercho, d Poscht im Dorf Langnou, im Bärau u im Ilfisquartier z vertrage u zwar drümau i der Wuche. Für das hets dennzumale e Aawaut brucht! Usem Jahr 1851 isch o dr eutischt Fahrplan vor Poschtgutsche vo Bärn uf Luzärn vorhande. D Poschtgutsche isch am siebni z Bärn abgfahre u am nüni z Grosshöchstette gsy u am zwänzg a zähni z Langnou. Vo dert isches wyter uf Luzärn, wo me am Aabe am haubi sächsi syg aacho. Einisch im Tag isch de o e Poschtgutsche vo Luzärn uf Bärn gfahre. Die Poschtgutsche isch am vieri am Nami z Langnou ytroffe u churz vor de Achte z Bärn – we aues guet isch gange.