Wo ds Poschtbüro no 13 Stung isch offe gsy

Ab 1854 hei de d Poschthauter d Briefe u Päckli nümme säuber müesse vertrage, me het e Briefträger aagsteut. Im 1858 isch z Langnou sogar eine aagsteut worde, wo im Frittebach, ir Gou, z Riegene u im Hüehnerbach het d Poscht chönne vertrage, i dr Regu vier Mau ir Wuche. Am 1. Ougschte 1861 isch de z Langnou d Eröffnig vom Bahnhof gsy u genau zwöi Jahr speter  isch beschlosse worde, dass me ab hüt d Poscht sogar zwöi Mau täglech müess vertrage – ömu afe im Dorf Langnou. Dr Poschthauter isch e Eduard Lüthi worde, dr Grosssuhn vom erschte Poschthauter Lüthi. Dass ds Amt vom Poschthauter quasi isch vererblech gsy, chunnt i viune Gmeinde hie im Ämmitou vor. Vo 1863 het me o es Verzeichnis, wenn das ds Poschtbüro isch offe gsy. Dir chöit nech däiche: Das isch angersch gsy aus hüt. Dr Poschthauter hets Büro vom Morge am sibni bis am Abe am nüni. D Mittagspouse isch ei Stung gsy. Im Juli 1875 het me de o d Bahnstrecki vo Langnou uf Luzärn ygweiht u d Poschtgutsche isch Gschicht worde. Nume no vo Langnou uf Sumiswald isch e Gutsche gfahre. Die het Platz gha für drei Passagier u d Poscht. D Reis vo Langnou uf Sumiswaud isch denn zwo Stung gange. D Poschtbüro sy üeblecherwys i de Privathüser vom Poschthauter gsy. Wäge däm het de o ds Poschtbüro gänderet, we dr Poschthauter het gwächslet. Z Langnou het me ersch im Jahr 1883 es Poschtbüro bout. I däm Huus a dr Dorfstrass 11 isch hüt dr Früschmarkt. 1901 sy de scho nüün Lüt bir Poscht z Langnou am Schaffe gsy u me het e nöji Lösig müesse sueche. Dr Fritz Wyss, dr Verleger vom Ämmitauer Blatt het die Sach i d Hang gno u vis-à-vis vor Druckerei es Poschtbüro la boue. Am 1. Juli 1901 het me scho chönne yzieh. Vom Plane bis zum Yzug isch nid emau es Jahr vergange. Hüt chönnte me das nümme, da gieng scho ds Formuliere vom Bougsuech lenger. Im 1912 isch o z Langnou e Flugtag gsy. Me het wöue Gäut uftribe, für ne schwyzerischi Luftwaffe chönne z gründe. Drzue isch für die Flüg e spezieui Langnouer «Flug-Poscht-Margge» gmacht worde.