Ds "Fröilein vom Amt": Dr Gustav Blasimann. / Bild: zvg
Dr Nachfouger vom Eggiwiler Poschthauter Haldemann syg e chlyne Maa gsy. Aber d Arbeit heig sowieso si Ghiufme, dr Arthur Heimann gmacht. Är heig dennzumau aus Lehrling bim Notar Gränicher gschaffet u das Poschtamt so näbedüre gmacht. Öb dr Haldemann ihm dr Lohn het zaut, isch historisch nid belegbar. 1884 het das Amt de dr Notar Gränicher überno, aber dr Heimann heig gschaffet wie gäng scho. 1886 isch das aber du nüm gange, dr Notar syg so chrank worde, dass d Poscht e Nachfouger heig gsuecht. So isch dr Gustav Blasimann Poschthauter worde. Die Familie isch scho lenger im Eggiwiu aus Krämer u Schryber bekannt gsy. Am Gustav si Vorfahr isch im Heidbüeu hinger Gmeinsschryber gsy u het e Lade gfüert. Är isch drby 1873 dr erscht Telegrafischt vo Eggiwiu worde u het drzue 1904 aus «Frölein vom Amt» o d Telefongspräch vermittlet.
Die Vermittler vo de Telefon hei e wichtigi Roue gha, wüu si hei chönne zuelose, was so aus verzeut isch worde am Telefon (wener het wöue). Im Eggiwiu hets 1904 vier Telefonaaschlüss gha: d Gmeinsschryberei, dr Händler Johann Eichenberger-Bürki u de no dr Löie u dr Bäre. 1905 het de o d Sagerei u dr Gaschthof zur Tanne ir Aeschou e Telefonaschluss übercho. Es isch dokumäntiert, dass ds Telefon im Jahr 1896 im Eggiwiu isch cho, aber vo denn hani kes Telefonbuech. Imene Verzeichnis usem Jahr 1932 hani gseh, dass es denn im Eggiwiu u Aeschou scho 59 Abonännte het gä. Komischerwys het denn der Notar ke Aaschluss gha, aber drfür het dr Hirt uf em Rämisgumme chönne telefoniere!
1940 isch am Blasimann si Suhn, Paul, Poschthauter worde. Auso o im Eggiwiu isch ds Poschtamt i dr Familie blibe.
Är isch 1980 pensioniert worde. I däm Jahr isch d Poscht inere Baragge hingerem Bäre gsy. No hüt gits im Eggiwiu e Poscht, was afe e Säuteheit isch.
Ir Aeschou isch im Jahr 1863 e Poschtablag cho. D Bewohner vo Aeschau u Horbe hei z Bärn e Petition ygreicht, me müess unbedingt o z Aeschou e Poscht ha, uf Eggiwiu oder Signou z loufe syg z wyt. Die Poscht isch aber im Jahr 2000 zue ta worde.