Dr unger Steffisbärg ligt ufere zvg. Ahöchi nördöschtlech vo Zäziwiu. / Bild: zvg
Woni dr Ortsname «Steffisberg» ha gseh, hani eigentlech «Steffisburg» gläse, villech isch es öich o grad eso gange. Stäffisburg bi Thun isch haut es grosses Dorf, wo me kennt. Dass es hingäge o «Steffisberg» git, hani fasch e chly per Zuefau gmerkt, woni e Charte vom Gebiet Zäziwiu-Oberthu ha gstudiert. Es git dert «Steffisberg», «unger Steffisberg», «Steffisberghüsi» u de no dr «Steffisbergwaud» – de muess es auso mit däm «Steffis» scho öppis uf sech hat.
Zersch däicht me ja bi dere Ortsbezeichnig ganz eifach a Vorname Steffi. Dä isch ab de Sächzgerjahr im dütschsprachige Ruum geng wie beliebter worde. I de Sibezger- u Achzgerjahre isch dä Meitliname i dr Hitparade geng i de erschte zäh inne gsy. Ab de Nünzgerjahr sy de d Steffis wieder chly exklusiver worde.
Weme ja itze dä Ortsname ir Gmein Oberthu wot dütte, de chönnt me ja einfach säge: Das isch dr Bärg vor Steffi.
Weme aber luegt, wie aut die Ortsbezeichnig isch, de merkt me sofort, dass das mit dr Steffi äue nüt wird, wüu das e zimli nöimödeschi Variante vo Stephanie isch. U dä Ortsname isch für es «normaus» Heimet sehr, sehr aut. Ds eutischte erhautene Dokumänt isch nämlech usem Jahr 1340 oder 1342: «min guot und eigen, dem man da sprichet der Stefensberg, daz da lit in der parroschie von Hoenstetten» – da het auso eine klipp u klar fescht- ghaute, dass das Guet Steffisbärg de ihm ghöri u dass das ir Gmein Höchstette sy, woby hie d Chiuchgmein gmeint isch.
Dä Ort fingt me wyter o im Urbar vo dr Herrschaft Signou mit de drü Gricht Signou, Röthebach und Bigle usem Jahr 1547. Dert steit zwar e chly komisch «Stäuisbärg» – aber villech het o eifach dr Schryber e chly pfuderet. I de Amtsrächnige usem 1664 cha me de ömu ume «uff dem Stäffisberg» läse.
Im Urbar vomene Lächeguet vo Rütene bi Zäziwiu usem 1553 isch wyter no e Ort ytreit, wo me «nempt Steffis Rüti». Villech het das zum Steffisbärg ghört.
Dr Ursprung vo «Steffisberg» isch übrigens nid Stephanie, wo ja die wyblechi Form vom heilige Stephanus isch – ömu nid
diräkt. Die Ortsbezeichnig chunnt nämlech vom Familiename «Steffen», wo unger angerem Heimatort z Affoutere, Lützuflüe, Dürreroth u Trueb hei. Dr Familiename chunnt aber de scho vom Personename Stephan.