Über dä Wäg am "Scherpfrein" sy d Hütliger z Predig gange. / Bild: Bruno Zürcher (zue)
«Scarpf» isch es Wort us dr authochdütsche Sprach. Das het sech nächär wyter entwicklet über «scharph» zu «scharf».
Dir gseht, das git dasmau auso e scharfi Sach.
Scho imene Dokumänt vo 1531 isch «der scherpfennacher» im hütige Grosshöchstette erwähnt. I däm Acher sy sicher scharfi Sache aabout worde, wie Chili u so. Aber weme chly weiss, was die Lüt denn gässe hei, de isch schnäu klar, dass das nid eso isch gsy. D Lüt sy vor auem froh gsy, we öppis isch ufe Tisch cho.
Äbefaus i Dokumänt usem 16. Jahrhundert isch z Hütlige «das Scherpffenacherli» notiert worde u wyter no «Scherpfrein».
Was isch de gmeint, wes nüt mit Chili u Co. z tüe het? Es sy eigentlech zwo Sache, wo i Frag chöme. Erschtens chönnts dert scharf ueche ga. Das dörfti z Hütlige dr Grund sy, wieso dä Ort die Bezeichnig het übercho. Imene aute Verzeichnis steit nämlech no, dass dä «Scherpf-rein» e stotzige «Karrweg» am Afang vom Predigerwäg syg. Das isch auso dr Wäg gsy, wo d Lüt vo Hütlige au Sunndig hei müesse unger d Füess näh, für z Predig z ga.
Dr zwöit müglech Ursprung chönnte scharfi Steine sy. I de Bärge gits das natürlich no viu. Ds Gebiet «Scherpfenberg»
ligt grad hingerem Hohgant ir Gmein Habkere. Dert hets sicher settig Steine. Es chönnt aber o sy, dass dr Name o eifach vom scharfkantige Grat chunnt.
Wyter unger, dert wos e Acher het, meint ds Wort «scharf» dass es e steinige Bode het. Das isch de nid gäbig gsy füre d Bure, wüu si dr Pflueg fasch nid i Bode hei brunge. Wüu das mitem Zacherfahre über Jahrhundert e ganz aasträngendi u ufwändegi Sach isch gsy, sy Ächer, wos äbe dert het gha, o entsprächend benamset worde: «Herti». Obschon ds Ämmitau – ömu hützutag – nid grad es typischi Acherbouregion isch, hani die Bezeichnig öppe es Dotze Mau gfunge. So zum Byspiu z Oberburg oder z Herblige. «Herteche» heisst wyter es stotzigs Bord bi Obergoudbach. Was dr zwöit Teu «-eche» meint, chame nid klar bestimme. Es chönnt vo «Acher» cho aber o vom mittuhochdütsche «ahe», wo «Fluss» oder o augemein «Wasser» bedütet. Wüu dä Bitz Land grad am Goudbach isch, wär o das müglech.