D Poscht im Fankis het geng offe gha

Im 1923 het im Trueb d Tochter vom Poschthauter Wegmüller ds Poschtbüro übernoo. Ds Frölein Frieda Wegmüller het de o ds Büro i ihres nöie Wohnhuus im Friedheim züglet. 1946 het dr nöi Poschthauter Brächt Röthlisberger ds Poscht-amt überno u de 1950 i sis nöie Huus ar Dorfstrass züglet. 1962 het de dr Fritz Wüthrich ds Büro überno, 1992 si Suhn Peter. Ändi März 2009 isch d Poscht im Trueb zueta worde, sithär gits o hie wie hüt fasch auneorte nume no e Huus-Service! Scho im Jahr 1960 het Trueb übrigens e Wärbedatumsstämpu übercho, wo für Wanderige im Napfgebiet het gworbe. Logisch: Wüus ja nüt isch worde mit em Napfbähnli, muess me no hüt uecheloufe! Im Fankis hinger isch de ab 1900 e Poschtablag cho. Dr Johann Wüthrich, är isch Brunnemacher gsy, isch dr erscht Ab­lagehauter gsy. «Poschthans»

het me ihm gseit. 1928 het dr Fritz Wüthrich das Poschtbüro überno. I sim Büro syg es Täuer ufghäicht gsy, wo druf isch gstange: «Im Trueb chasch ga so wit ast wit, e Bürozyt bir Poscht gits nit. Wir hei gäng off vo früeh bis spät, scho nume das isch ds Löhndli wärt». Vo 1963 bis 1967 het de dr Werner Augsburger ds Poschtbüro gfüehrt u nächär dr Werner Brechbühl. Dä het imene Bytrag vor «Wuche-Zytig» verzeut, dass är d Poscht zwar mit em Jeepli heig verteilt, aber ufe Schweschterebode heig är drümau ir Wuche müesse loufe, wüus dert ke Fahrwäg heig gä. Wo är 2002 isch pensioniert worde, isch ds Büro de o grad zueta worde. Chröschebrunne isch früecher sehr wichtig gsy, wüus dr Gränz­ort zwüsche Luzärn u Bärn isch gsy. Dert hets auso e Zou gä, wo me het müesse chönne Gäut wächsle u o e Wirtschaft isch nötig gsy. Drum isch dert scho im 1854 e Poscht cho. Dr Johann Zaugg, dr Öler, het d Poscht gfüehrt. Dr Zou isch zwar denn scho nüm gsy, dä isch mit dr Gründig vor Eidgenosseschaft 1848 zuetaa worde. Bsungersch isch no z mäude, dass d Poschtleitzau vo Chröschebrunne z Nummero 6199 isch gsy, es het auso poschtmässig zu Luzärn ghört! Das isch glych wie im Schangnou.