Ds letschte Mau hanech vo däm Chorgrichtshandu vo Lützuflüe verzeut, wo e Magd «plötzlech» isch schwanger gsy. Si het de probiert - oder isch drzue drängt worde – es Tränkli z näh, wo zunere Fäugeburt hät söue füehre. Dr Hans Löiebärger, dr potänzieu Vater vo däm Bebe, het ohni grossi Usred zuegä, dass är die Kläy scho mög. Är hät sech scho lang gärn vo sire Frou wöue la scheide. Choche chönn si nid u Ching heigs o kener gä! Dr Landvogt het das aus Usred nid la gäute u het ihn (u d Marie o grad) wäge Ehebruch zum sogenannte Härdfau verurteilt. Dr Härdfau isch e Schandstraf gsy. D Täter hei vor dr ganze Gmein amene Sunndig nach dr Predig vor dr ganze Gmein müesse abchnöile u ihrer Sünde bekenne. Grundsätzlech isch den d Gmein o e chly verantwortlich gsy für d Straftate vo ihrne Bewohner. Dr Landvogt het de zuesätzlech o dr Chrämer z Grüene sträng verwarnt, so settigi Mittu, wo zunere Fäugeburt chönne füehre, z verchoufe. O aui Schärer i dere Umgäbig hei es Schrybe vom Landvogt übercho, dass «Beyhilfe zur Abtreibung» sträng verbote syg. Ds Problem isch aber: Dass das Rosmarinöl üsserlich aagwändet, für verschiedeni Bräschte sehr nützlech wär. Wie wot e Händler chönne verantwortlich sy für d Aawändig vo sine Chunde? Dr Landvogt het de für am 26. Herbschmonet 1777 ir Chiuche z Lützuflüe e Abbitt aagortnet. Drzue isch unger dr Kanzu e länge Bank ufgsteut worde. Die beide, d Kläy u dr Löiebärger, hei vor dr Predig inere Zeremonie, begleitet vom Landvogt, vom Schloss dür ds Dorf müesse loufe, u hei de uf däm Schandbänkli unger dr Kanzu müesse abhocke. So het se die ganzi Gmein während dr Predig chönne gschoue. Nach dr Predig hei ds Vouk nid hei chönne. D Lüt hei müesse ufstah u die beide Delinkwänte hei müesse abchnöile. De het dr Landvogt Daxelhofer e Red gha, wo är die beide Lütli het ermahnet. Är heigs aber nid bösaritig gseit, die beide syge ja schliesslech röiig gsy. I cha mir guet vorsteue, dass die uf em Schloss obe scho drfür gsorget hei, dass die zwöi ihres «Verbräche» lut u dütlech beröit hei. We das nid so wär gsy, de hätti dr Staat sogar d Todesstraf wäge Chindsmord chönne aaordne. D Marie Kläy het vor dr ganze Gemein gseit, dass «ich Unglückselige beseufze, beweine und beräuwe nunmehro mit Wehmut meines Herzens, diesen meinen schwachen jugentlichen Misstritt». Dr Sünder Löiebärger het o müesse sy Entschuldigung vor dr ganze Gmein säge, aber leider isch sini Red nümme vorhande. Das isch äbe no die gueti auti Zyt gsy. Wär weiss, villech wär o hüt bi sonere Abbitt d Chiuche
e chly vouer weder normalerwys.