Das isch e ganz chnochegi Sach

Die, wo einisch es Rüppi abenang hei gha, wüsse, dass das e längwyregi u schmärzhafti Sach isch. Was hingäge nid aui dörfte wüsse: «Rüppi» oder o «Rippi» gits o aus Ortsbezeichnig. Dass dert öpper einisch es Rüppi quetscht het, isch zimli sicher nid dr Ursprung vo dene Ortsnäme. Ömu sicher nid bi de Heimet «Rüppi» ir Gmein Arni. Dert isch nämlech ds Gländ eso wäueförmig – es gseht würklech e chly us, wie Rüppi vomene überdimensionale Körper. Das isch de Lüt scho früecher ufgfaue: So list me i de Amtsrächnige vo 1701 «im Rüppi hinder Biglen» u o i Dokumänt vo 1785 u 1838 steit geng «Rüppi». A dere Ortsbezeichnig het auso nie gross öppis gänderet. No wäsentlech früecher isch e Ort «Rüppy» ir Gmein Trueb. Dä steit nämlech scho im Urbar vo 1531. Äbefaus isch dert e «Ryppeggen» erwähnt – wo, dass das isch, weissi aber nid genau. Es muess äue ir Neechi vom Ried sy. U när gits no ir Gmein Affoutere e Höhezug bi dr Hirsegg, wo «Rüppi» heisst. O bi denen Ortsnäme dörfti d Form vom Gländ dr Ursprung vo dene Bezeichnige sy. Es git aber no e angeri Müglechkeit u das isch dr Spitzwägerech. Däm Chrütli het me i früechere Zyte «Ripp» gseit. Das chunnt äbe vom authochdütsche «Ripp» - u «Rüppi», auso dr Chnoche, chunnt vo «ribba». E angere Chnoche, wos o zumene Ortsname het brunge, isch d Elle. Z Lützuflüeh gits ja dr «Ellenberg» u dä isch de scho imene Dokumänt vo 1246 erwähnt; der steit «in Ellenberc». Mitem Chnoche an sich het die Sach de aber nüt z tüe. Dr Ursprung dörfti e Churzform vomene Personename sy. «Ello» oder «Ellin» – u die chöme vom Name «Elmar». Was me äbefaus i Ortsnäme fingt, isch «Chnöi». Die, wo gö ga wandere, wüsse, dass es eim bim Acheloufe «id Chnöi cha schiesse». Me fingt o ganz ähn­lechi Ortsnäme: «Chnöibräche». Das gits z Dürreroth, z Flüehli, z Rüederswiu u z Louperswiu u benamset steili u gfährlechi Wägli. Was es o no git, isch, we öppis usgseht wienes Chnöi. Das isch bim «Kneubühl» z Sumiswaud eso oder o bim «Ämmechnöi», ir Gmein Rüederswiu.