Bi de Wappe gits es paar Gstautigsregle

Das mit de Farbe bi de Wappe isch no so ne Sach. Me cha nid jedi näh. Es git nume vier Farbe, nämlech Rot, Blau, Grüen u Schwarz u de no zwöi Metau, Siuber u Guwd! Nume we dir katholische Bischof oder sogar Kardinau wärdet, die gits no ei wyteri Farb, nämlech Purpur. Purpur isch so öppis i Richtig Violett, es wird us Meeresschnägge gmacht u die Farb isch scho zu Zyte vo de Römer tüür gsy. D Senatore hei dörfe a ihrne Toga-Gwänder e Streife Purpur la aanäihe u nume dr Cheiser het dörfe Purpur gfärbti Chleider trage. Es git no e wytere Grundsatz bi de Wappe. Me darf nie zwü Metau oder zwo Farbe diräkt nämenang ha. Auso öppe Rot u Blau direkt näbenang. Vo däm här isch ds Wappe vom Tessin auso fautsch! Grundsätzlich isch es no so, dass Grüen nie darf d Houptfarb sy. Grüen isch d Farb vom Profet Mohammed u drum füre chrischtlech Ritter verbote gsy. I dr Französische Revolution het me das mit de Farbe nid so gnau gno u Grüen aus Farb vor Freiheit gwäut. Drum o ds Wappe vom Kanton St. Gaue mit dr Grundfarb Grüen. Weme es Wappe beschrybt, de macht me das gäng vo hinger. Auso für Nid-Heraldiker: rächts u links isch gäng vertuscht! I ha hie ds Wappe vo de Pfäffli vo Signou. Beschribe wird das: «In Silber ein schwarzer Franziskanermönch, rechts einen schwarzen Rosenkranz und links eine rote Bibel tragend». Massgäbend isch gäng d Beschrybig u nie es Bild. Me muess auso genau das zeichne, wo d Beschrybig verlangt. We me bi de Pfäffli zum Byspiu statt Siuber hät Guwd gno, wär das fautsch. Uf vieune Wappe hie im Ämmitau gseht me o Stärne. Hie gits o e Grundsatz ir Schwyz. We der Heimatort ir Dütschschwyz liegt, muess me e sächsstrahlige Stärn zeichne, bi de angere Regione vo dr Schwyz e föifeggige Stärn! Itze müesst dir nume no druf luege, das öies Familiewappe nid amene Gmeinds- oder Kantonswappe tuet glyche. D Zürcher vo Trub dörfe auso nid einfach ds Wappe vom Kanton Züri näh!