Grad scharewys gits dä Ortsname nid

«Scherlebach» isch e ganz exklusivi Sach. Im Gebiet vor «Wuche-Zytig» fingt me dä nume grad a eim Ort - e chly nordweschtlech vo Sumiswaud. Dert gits vorder u hinger Scherlebach. Dr Ursprung vo dere Bezeichnig isch sicher der Bach, wo wyter obe im Waud aafat u när zwüsche dene zwöi Heimet düre louft u de i Griesbach geit. I ds Oug gstoche isch mir dä Ortsnäme, wüu är imene aute Dokumänt uftoucht, wo no uf latinisch gschribe isch worde. «Scherlebach», d Schrybwys isch auso scho im Jahr 1250 genau glych gsy, ligi i dr «parochia de Swomolswalt». Wyter isch dä Ort imene Schrybe vo 1389 erwähnt, dert isch e «Peter ze Scherlibach» erwähnt. U wieder chly angersch isch dä Ort imene Urbar usem Jahr 1426 gschribe worde: «michel zuo Scherlybach». Imene Urbar vo 1530 isch de erwähnt, dass dr «Scherlÿbach» amene Ruedÿ». D Schrybwys mitem «e» toucht eigentlech ersch wieder im topographische Atlas usem Jahr 1885 uf. Itz steut sech natürlech no d Frag, was de mit «Scherle» gmeint chönnti sy? Vor Schrybwys här isch dr Ursprung äue nid dr Familiename Scherler. Dä Name het ursprünglech Lüt bezeichnet, wo vo Scherli - aus Ober- oder Niederscherli sy cho - genau glych wie mir Zürcher vo Züri. Aber dr Ursprung chönnti dr glych sy wie bi dene zwöi Scherli. Gnau säge, vo was dass das chunnt, chame nid. Es git da grad es paar Variante, u dass die Sach zimli aut isch, machts nid grad eifacher. Afe einisch chönnt Scherle vo «Schar» cho, was aber nid e Bitz vomene Pflueg meint, sondern es zueteilts Gebiet oder e Mängi. Mitem mittuhochdütsche «schër» isch o es abtrennts Stück Land bezeichnet worde. När chunnt, wie bi aute Bezeichnige no hüüfig, o e Name i Frag. Hie villech e verchürzti Form vom authochdütsche «Skerilo», wo scho im 9. Jahrhundert uftoucht. Oder o e Koseform vom Personename «Scherilo» chäm i Frag. De hätti de das Gebiet vo däm Bach bi Sumiswaud vor nes paar Jahrhunderte amene Maa mit däm Name ghört.