We d Brut e settigi Münze im Schueh heig, bring das Glück. / Bild: zvg
Chürzlech bini gfragt worde, wie das genau göng wäge de Sache, wo e Brut müess ha: Öppis Auts, öppis Nöis, öppis wo me nume usglehnt het... Da bini überfragt gsy. Usegfunge hani, dass dä Bruuch us Ängland chunnt u dert öppe so sit 1850 bekannt isch. Ganz genau muess auso e Brut usgrüschtet sy mit:
a) Öppis Auts (zum Byspiu Schmuck oder dr Brutschleier vor Ur-Ur-Ur-Grossmueter)
b) Öppis Nöis (auso öppis, wo me für d Hochzyt het kouft)
c) Öppis wo me darf bruche (da chunnt irgendöppis Nützlechs i Betracht, wo de muess chönne nach dr Hochzyt umegä wärde)
d) Öppis Blaus
e) U de no e «Silver Sixpence», auso e Sächs-Pence-Münze, wo sech d Brut müess i d Schueh stosse - öb das bequem isch?
Z Grossbritannie sy die Münze scho lang nümme in Gebruch. I ha aber gläse, dass me die Münze hüt no prägi - nume für z Ängland u i de Staate d Brüt drmit chönne uszrüschte! I ha no gläse, dass me dä Bruch ir Schwyz nid us Ängland übernoh heig, sondern dass mir die Sach vo Hollywood-Liebesfiume heige! Itz het mi aber no intressiert, was es äch im Ämmitau für Hochzytsbrüch het gä. Drzue hani im Buech vom Emanuel Friedli nachegluegt, wo är über Lützuflüeh gschribe het. Das isch im Jahr 1900 usecho u dr Friedli het die Sache so ab de 1880er-Jahr afe zämetrage. Dennzumale heige fasch aui Brutpaar zwöi Mau ghürate: z ersch ziviu ufem Amt u när no chiuchlech, meischtens ir Chiuche vor Brut. Dr Friedli het gschribe, dass es sehr wichtig syg gsy, dass me d Brut guet kenni. I dr Regu heige sech Brut u Brütigam scho lang kennt, zum Byspiu vo Stubete oder Spinnete. Dert heige d Jünglinge die Meitli chönne gschoue u we de öppis hät chönne passe, isch me de uf d Chiut. Das het me natürlech am Abe gmacht. Är het vorem Fäischter müesse «töppele» u «chlage» bis si de het ufta! Ds Wort «Kilt» isch uraut u heiss uf authochdütsch «Abe». Dr Chiuter heig bir Brut uf drü Sache söue luege: Si söu suber gwäsche sy, nid nume e chly oberflächlech, zwöitens söu sy chönne aapacke u de wärs no guet, we si tüeg Danke säge, we si öppis überchömm.