I wirde gäng ume gfragt, wäg de Ämmitauer Vorfahre vom rychschte Mönsch uf dr Ärde, am Elon Mask. Dass «Mask» nid us em Ämmitau chunt, lüchtet äue aune y. Aber sini Mueter «Maye» isch e «Haldeman». Dr Name Mask isch vo Südafrika. D Vorfahre sy Holländer gsy, wo dert e Kolonie gründet hei. Das Vouk, me seit dene «Bure» gits geng no u gredt wird «Afrikaans», anere Sprach wo mitem Holländische verwandt isch. Es isch eini vo 11 Nationausprache - u mir sy scho mit vier Sprache z friede. Bi de Haldemann oder Haldimann het bis itz niemmer chönne säge, wenn die uf Amerika sy cho. Sit es paar Tag isch das Rätsu glöst! D Maye Haldeman isch vo Kanada wie ihre Vater o. Dr Urgrossvater vom Mask het z Saskatchewan (Kanada) buret. No ei Generation früecher, dr Jeremiah (Jenny) Haldeman, isch im amerikanische Bürgerchrieg Korporau gsy u het aus Farmer in Wharton, Pennsylvania, gläbt. Das passt guet i d Gschicht yche, dass d Haldemann wägem Gloube aus Töifer hei müesse flüchte. Fasch aui Ämmitauer, wo ab 1670 wägem Gloube hei müesse flüchte sy uf Pennsylvania gange. Das Gebiet het denn no zu Grossbritannie ghört. O dank dr Forschig vom Hansjörg Haldimann wüsse mir itz, dass 1726 dr Peter Haldimann z Pennsylvania isch aacho u zwar im Dorf Donegal. Dr Grossvater vo däm isch dr Christian Haldiman gsy, wo 1651 e Barbara Wyss ghürate het. Gwohnt hei si ufeme Hof ir «Hinter Schwändi» ir hütige Gmein Bowiu. Mir wüsse usere Urkunde, dass es dr ungeri Hof muess sy. Es isch aktekundig, dass dr Haldimann 1673, wo dr Staat sini töiferischi Frou het wöue cho abhole, sich mit dr Mischtgable ir Hang für si Frou gwehrt het. D Vorfahre wyter z rügg sy e Ueli Haldimann gsy, wo 1568 ghürate het, u dä wieder isch dr Suhn gsy vom Wilhelm Haldimann. Däm si Vater, Niklaus (Klewi) Haldimann, het das Guet bi Bowiu um 1500 kouft. Dä isch vo «Horbe» cho, wo sim Vater es Guet ghört het. U däm si Vater isch dr «Hensli an der Halden» bi Langnou gsy. Das wäre auso itze d Vorfahre vom Elon Mask. Dr Gemeinrat vo Bowiu cha auso itze e Hof choufe u ne am Musk schäiche - we är nachhär uf Bowiu züglet u i Zukunft d Stüüre dert zaut, wär das sicher kes schlächts Gschäft.